Pagduma sa solid waste sa mandaue tun-an sa lungsod sa Padre Burgos

CEBU, Philippines —  Nagtinguha ang lungsod sa Padre Burgos sa Southern Leyte nga musunod sa pipila ka environmental practices sa Mandaue City human sa ilang benchmarking visit sa siyudad.

Niadtong Septiyembre 30, 2026, mibisita sa Mandaue ang delegasyon sa Padre Burgos aron tun-an ang pamaagi sa siyudad sa pagpanalipod sa kinaiyahan, solid waste management ug pagpatuman sa mga lokal nga ordinansa alang sa environmental protection.

Gipresentar sa Mandaue City Environment and Natural Resources Office (MCENRO) ang pipila ka mga programa nga gipatuman sa siyudad, lakip ang pakigtambayayong sa mga recycling facility, ang Eco-Enforcers Transformation Program ug ang koordinasyon sa Department of Education (DepEd) Mandaue aron ma-integrate ang solid waste management sa mga school curriculum.

Gipaambit usab sa Office of the Sangguniang Panlungsod ang mga ordinansa ug legislative measures sa Mandaue nga nagsuporta sa environmental protection ug uban pang programa sa lokal nga pangagamhanan.

Gipangulohan ni Councilor Engr. Sam Michael Demeterio, chairman sa Committee on Environmental Protection and Natural Resources, ang delegasyon sa Padre Burgos.

Matud ni Demeterio, ilang gilauman nga ma-adopt sa ilang lungsod ang pipila sa mga pamaagi nga ilang nakat-unan sa Mandaue, ilabina sa legislation ug solid waste management.

“We have learned a lot especially for our legislative body and the solid waste management program. Gamay ra mi nga munisipyo but we are growing. Ang framework nga inyong na-establish diri, we could also adopt in our municipality,” matud ni Demeterio.

Nagpasalamat usab siya sa Mandaue City Government sa pagdawat sa ilang delegasyon bisan og mubo ra ang panahon sa pagpahibalo sa ilang pagbisita.

Gidawat usab ni City Councilor Atty. Carlo Fortuna ang delegasyon ug mipahayag nga andam ang Mandaue sa pagpaambit sa ilang mga kasinatian ug pamaagi sa ubang local government units (LGUs).