Visayan Electric naghatag og kuryente sa 552 ka pamilya

CEBU, Philippines —  Nakaangkon og mas luwas ug direktang access sa kuryente ang 552 ka panimalay sa siyudad sa Naga, Cebu pinaagi sa House Wiring Project sa Visayan Electric, nga bag-o lang nahuman sa kataposang beneficiary community niini sa Barangay Uling.

Ang proyekto naghatag og kompleto nga house wiring sa mga kwalipikadong kabus nga pamilya sa 12 ka barangay, nga nakatabang kanila sa pag-ilis sa temporaryo ug posibleng delikadong mga tinubdan sa suga ngadto sa mas luwas nga koneksiyon sa kuryente.

Usa sa mga benepisyaryo mao si Jennelyn Dalaguit sa Barangay Uling, nga miingon nga kaniadto nagsalig ang ilang pamilya sa gasera ug extension wire nga ilang gikonektar sa balay sa usa nilang paryente.

“Lisod kaayo ug ngitngit ang kinabuhi kung walay kuryente,” matud ni Dalaguit.

Matud niya, kaniadto kinahanglan pa nga moadto ang iyang mga anak sa balay sa ilang mga in-laws aron makahimo sa ilang mga assignment tungod kay walay saktong suga sa ilang panimalay.

Miingon si Dalaguit nga delikado ang ilang temporaryong koneksiyon sa kuryente apan napugos sila sa paggamit niini aron matubag ang ilang pangunang panginahanglan.

Matud sa VECO sa pahayag niini, pinaagi sa proyekto, magamit na sa mga pamilya ang kuryente alang sa suga, pagtuon ug paggamit sa mga panginahanglan sa panimalay.

Ang inisyatiba gipondohan pinaagi sa Energy Regulations No. 1-94 (ER 1-94), nga naghatag og pinansyal nga benepisyo sa mga host community sa mga pasilidad nga nagmugna og enerhiya.

Ubos sa ER 1-94, ang mga host community makadawat og usa ka sentimos matag kilowatt-hour (P0.01/kWh) sa kuryenteng mamugna. Ang generation company nga KEPCO usa sa mga nag-unang contributor sa pondo nga gigamit alang sa mga beneficiary community.

Gigamit sa VECO ang mga pondo alang sa electrification sa pag-deploy og mga kwalipikadong electrician nga nag-instalar og luwas ug kompleto nga house wiring sa mga panimalay sa mga kwalipikadong kabus nga pamilya.

Tumong sa proyekto nga mahatagan ang mga panimalay og mas luwas nga access sa kuryente samtang makatabang sa pagpauswag sa kahimtang sa pagpuyo sa mga komunidad nga ilang giserbisyohan. (BANAT NEWS)