Microloan ipahuwam sa SSS, GSIS sa mga trabahante

CEBU, Philippines — Mga trabahante sa pribado ug gobyerno nga sektor makabenepisyo sa mga microloan program sa SSS ug GSIS para sa emerhensiya, tuition, medical expenses, panginahanglan sa panimalay ug uban pang short-term financing.

Ang SSS LoanLite nagtanyag og P1,000 hangtod P20,000 nga loan sa kwalipikadong miyembro, nga adunay 8 porsiyento nga interest kada tuig ug repayment terms nga 15, 30, 60 o 90 ka adlaw.

Samtang ang GSIS Ginhawa Go nagtanyag og P1,000 hangtod P50,000 nga loan sa kwalipikadong government employees, nga adunay interest nga 6% hangtod 7% kada tuig, depende sa matang ug gidugayon sa membership ug premium contributions.

Matud ni Finance Secretary Frederick Go sa gipadala nga press statement, gitumong ang mga programa sa paghatag og mas sayon ug mas barato nga access sa kredito aron malikayan sa mga trabahante ang high-cost informal lenders sama sa “5-6.”

Ang SSS LoanLite mahimong ma-avail pinaagi sa UnionDigital Bank ug, sugod Oktubre, pinaagi usab sa DiskarTech app sa RCBC. Ang GSIS Ginhawa Go mahimong ma-apply pinaagi sa GSIS Touch app.

Gipahinumduman ang mga miyembro nga gamiton lamang ang opisyal nga channels ug susihon una ang interest, fees ug repayment terms sa dili pa mangutang.

Gikan Oktubre 24, 2024 hangtod Septiyembre 28, 2026, ang Ginhawa Go (Lite) nakapagpagawas og P29.67 bilyon nga mga pautang ngadto sa kapin 480,000 ka empleyado sa gobyerno.

Samtang, gikan Agosto 10 hangtod Septiyembre 28, 2026, ang UnionDigital Bank (UD) nakapagawas og kinatibuk-ang P2.08 bilyon nga pautang ngadto sa 170,000 ka miyembro sulod lang sa 41 ka adlaw nga aktibong operasyon.