Social media, bagong sukatan ng sarili

Sa panahon ngayon, ilang segundo lamang ang kailangan upang malaman natin kung ano ang ginagawa ng ibang tao. Isang scroll sa Facebook, Instagram, TikTok, o iba pang social media platform, makikita agad ang bakasyon ng iba, bagong damit, bagong gadget, achievements, at mga masasayang sandali. Ngunit sa likod ng bawat larawan at video, unti-unting nabubuo ang tanong: Sapat na ba ang sarili ko?

Hindi na bago sa atin ang paghahambing. Noon, maa­aring ikumpara natin ang ating sarili sa kaklase, kapitbahay, o kaibigan. Ngayon, tila buong mundo na ang maaari nating pag-ikumpitahan. Kapag may nakita tayong taong mas maganda ang buhay, mas maraming followers, mas mataas ang grades, o mas maraming nararating, madali nating isipin na nahuhuli tayo. Ang problema, madalas nating ikinukumpara ang ating totoong buhay sa pinakamagandang bahagi lamang ng buhay ng ibang tao.

Sa social media, hindi natin karaniwang nakikita ang kabiguan, problema, pagod, at insecurities ng isang tao. Ang nakikita natin ay ang larawang pinili niyang ipakita. Maaari itong litrato ng isang masayang pamilya, ngunit hindi natin alam ang mga problemang nangyari bago iyon. Maaari ring mukhang perpekto ang isang estudyante online, ngunit hindi natin nakikita ang mga gabing nagpupuyat siya dahil sa stress at pressure.

Dahil dito, nagiging mapanganib kapag ang likes, followers, views, at reactions ang nagiging sukatan ng ating halaga. May mga kabataang nakakaramdam ng lungkot dahil kakaunti ang likes sa kanilang post. May ilan namang nahihiyang ipakita ang kanilang tunay na sarili dahil baka hindi ito tanggapin ng iba.

Hindi naman masama ang paggamit ng social media. Malaki ang naitutulong nito sa komunikasyon, edukasyon, negosyo, at pagpapahayag ng sarili. Ang problema ay kapag hinahayaan nating ang isang virtual na mundo ang magdikta kung gaano tayo kahalaga. Hindi nasusukat ang halaga ng isang tao sa dami ng likes. Hindi rin nakabase sa followers ang kanyang tagumpay. At higit sa lahat, hindi kailangang maging katulad ng ibang tao upang masabing sapat tayo.

Marahil, kailangan lamang nating matutunang ibaba paminsan-minsan ang ating cellphone at tingnan ang sarili nating buhay—hindi sa pamamagitan ng camera, kundi sa pamamagitan ng tunay na karanasan.

Dahil sa huli, ang buhay ay hindi kompetisyon sa rami ng likes at followers. Hindi natin kailangang maging trending para maging mahalaga.