Cebu City nipalig-on sa pagpangandam sa El Niño

CEBU, Philippines — Gipahigayon sa El Niño preparedness team sa kagamhanan sa Dakbayan sa Sugbo ang follow-through meeting niadtong Septiyembre 28, 2026 aron palig-onon ang mga lakang alang sa siguridad sa suplay sa tubig atol sa El Niño Summit 2026.

Gituki ang rekomendasyon gikan sa summit niadtong Septiyembre 8, 2026 aron mapatuman ang mga lakang ilabi na sa pagpangita og alternatibong tinubdan sa tubig tungod sa posibleng kakuwang sa suplay sa tubig tungod sa huwaw.

Usa sa mga prayoridad pag-ila sa mga tabay ug poso sa matag barangay aron masuta ang mga tinubdan sa tubig nga mahimong magamit panahon sa magkuwang ang tubig.

Gitan-aw usab ang posibilidad nga ayuhon ang mga pribadong poso pinaagi sa tabang sa kagamhanan ubos sa kondisyon nga ipagamit usab kini sa mga silingan panahon sa panginahanglan.

Pinaagi niini, ang suporta sa gobiyerno mahimong makabenepisyo dili lang sa mga tag-iya sa poso lakip usab sa mga residente nga nanginahanglan og tubig.

Mangita usab og mga water supplier nga adunay sobra nga kapasidad lakip na sa pag-inspeksiyon sa kasamtangang water tank sa mga tunghaan sa siyudad nga mahimong makatabang sa pagdugang sa suplay sa tubig.

Palambuon usab ang rainwater harvesting, pagsuporta sa panginahanglan sa tubig sa agrikultura, pag-andam sa mga watershed ug pagtubag sa mga panginahanglanon sa imprastraktura.

Palig-onon usab ang mga kampaniya sa water conservation ug community education aron awhagon ang responsable nga paggamit ug pag-recycle sa sa tubig.

Plano usab nga mag-instolar og elevated water tanks ug pumps, ayohon ang mga pasilidad sa irigasyon ug i-upgrade ang mga sestema sa water distribution.

Lakip sa mga rekomendasyon ang pagpalambo sa malungtarong citywide water supply systems, mas dagkong reservoirs, water-impounding facilities, water recycling facilities, rehabilitasyon sa watersheds ug dugang nga mga tinubdan ug treatment facilities. BDB BANAT NEWS