2 Pinoy tourist nasawi sa Germany bus crash

MANILA, Philippines — Dalawang Pilipino ang nasawi sa isang aksidente sa bus sa Bavaria, Germany.

Sa ulat ng Philippine Consulate General sa Frankfurt nitong Linggo ng gabi, sakay ng bus ang 33 turistang Pilipino na bumiyahe mula Milan patungong Munich nang maaksidente ito sa S96 highway malapit sa Buchloe, kanluran ng Munich.

Hindi naman nasaktan sa nasabing aksidente ang dalawang Italyanong driver ng bus.

Lumalabas sa ulat na patungo ang bus sa isang event para sa Octoberfest, ang pinakamalaking beer festival sa mundo.

Sa pahayag ni Martin Cornils, tagapagsalita ng pulisya sa Fürstenfeldbruck, dakong alas-5:41 ng umaga nang mangyari ang aksidente.

Isang Italian tour bus na may humigit kumulang na 35 sakay, karamihan ay mga Pilipino ang bumibiyahe mula Milan patungong Munich para sa Octoberfest nang bigla itong lumihis sa kalsada at tumilapon sa mga halamanan bago tuluyang bumaliktad.

Sinabi ng konsulado na patuloy silang nakikipag- ugnayan sa ilang mga pasahero na naapektuhan at sa kanilang mga pamilya habang inaalam ang pagkakilanlan ng lahat ng mga sakay ng bus at inaalam na rin ang kanilang kalagayan sa mga ospital.

Nagpaabot naman ng pakikiramay ang konsulado sa pamilya ng mga nasawi.