Intel arm ng BOC may bagong pinuno

MANILA, Philippines — Dalawang opisyal ng Bureau of Customs (BOC) ang inilipat sa bagong puwesto bilang bahagi ng hakbang ng ahensya upang palakasin ang intelligence operations at administrative oversight nito.

Batay sa Customs Personnel Order na may petsang Setyembre 15, isinailalim sa re-assignment si Director III Thomas Narcise, na dating nakatalaga sa Customs Intelligence and Investigation Service–Intelligence Group (CIIS-IG), at si Director III Jeoffrey Tacio, na mula naman sa Strategic Advisory Office sa ilalim ng Office of the Commissioner.

Sa naturang kautusan, si Narcise ay itinalaga sa Commissioner’s Strategic Advisory Office, habang si Tacio naman ang inilipat sa CIIS-IG. Ang reassignment ay effective immediately at nilagdaan ni BOC Commissioner Ariel Nepomuceno.

Matatandaang nabanggit ang pangalan ni Narcise sa letter complaint na isinumite kay Pangulong Ferdinand “Bongbong” Marcos Jr. noong Disyembre 2025 ng ilang Customs officials, employees, at stakeholders. Sa nasabing liham, hiniling ang isang impartial investigation sa umano’y smuggling protection, corruption, at abuse of authority sa loob ng BOC.

Ipinatupad ang ­reassignment kina Narcise at Tacio kasunod ng pahayag ni Nepomuceno na agad reresolbahin ang imbestigasyon sa umano’y ilegal na aktibidad sa ahensya, partikular ang insidente ng pagsalakay ng Highway Patrol Group (HPG) sa isang warehouse sa Bulacan.

Tugon ito sa panawagan ni Senator JV Ejercito na dapat linisin ng BOC ang kanilang hanay.