57 ka baboy nga apektado sa ASF gipanglubong

CEBU, Philippines — Miabot na sa 57 ka baboy ang gipanglubong sa Barangay Toong sa Dakbayan sa Sugbo human mapamatud-an nga naapektuhan kini sa African Swine Fever (ASF).

Gipakita ni Konsehal Dave Tumulak ang operasyon sa paglubong sa mga baboy nga nagsugod pa niadtong Septiyembre 21, 2026.

Suma sa labaw sa Department of Veterinary Medicine and Fisheries (DVMF) nga si Dr. Jessica Maribojoc, 39 ka baboy gikan sa upat ka tag-iya sa usa ka compound ang unang gi-cull niadtong Septiyembre 21. Human sa pagpagawas sa resulta sa blood sampling nga gihimo niadtong Septiyembre 4 ug 10, nadugangan pa og 14 ang namatay nga baboy gikan sa duha ka tag-iya, hinungdan nga misaka sa 57 ang gilubong.

Matud pa ni Maribojoc nga naghinay-hinay og kamatay ang mga baboy mao nga kinahanglan sab nga ipanglubong aron nga dili na mokatap ang virus.

Gipasabot ni Maribojoc nga duha pa lang ka barangay sa siyudad ang opisyal nga adunay kumpirmadong positibo sa ASF nga mao ang Barangay Quiot ug Barangay Toong.

Giklaro usab niya ang impormasyon nga gipagawas sa chief of staff ni Mayor Nestor Archival nga si Kenneth Siasar diin giapil niini ang Buhisan ug Pamutan nga adunay kaso sa ASF bisan og wala pa kini makumpirmar.

Apan giisip kini nga hotspots tungod sa ilang kalapad ug duol kini sa Toong, maong gipahugtan ang interbarangay border control.

Usa sa dakong hagit nga giatubang sa DVMF mao ang kakuwang sa kooperasyon sa pipila ka mga hog raisers sa Barangay Toong.

Suma pa ni Maribojoc, daghang mag-uuma ang nahadlok nga ipa-blood test ang ilang mga baboy tungod sa pagtuo nga patyon dayon ang mga hayop.

Tungod niini, wala sila makapahimulos sa mga benepisyo sama sa livestock insurance, indemnification gikan sa national disaster fund, ug libreng alternatibong panginabuhian nga layer chicks nga gihatag sa siyudad sa mga mosalmot sa programa. Karon nga adunay laing barangay ang nagpositibo sa ASF, giklaro sa DVMF nga dili ang mga tag-iya sa baboy ang naglubong sa mga gi-cull nga hayop aron malikayan ang dugang nga pagkatakod.

Ang DVMF maoy nagdumala sa operasyon, ang Department of Engineering and Public Works (DEPW) maoy nagkawot sa yuta pinaagi sa paggamit og backhoe, samtang ang Cebu City Disaster Risk Reduction and Management Office (CCDRRMO) maoy responsable sa paglubong.

Sa pagkakaron, padayon ang DVMF sa pagsubay ug pagkuha og blood samples sa mga baboy sulod sa 500 metros gikan sa apektadong lugar sa Barangay Toong aron masayran kung adunay dugang kaso sa ASF ug mapugngan ang pagkaylap sa sakit. MEL BANAT NEWS