Drag racing sa NRA sa Mandaue City gibantayan

CEBU, Philippines — Tulo ka motorcycle riders nga pulos nag-edad og  gibanabanang 20 anyos ang gipang-isyuhan og citation tickets tungod sa reckless driving human sila nasakpan nga nag-drag racing sa Ouano Avenue sa North Reclamation Area (NRA), Mandaue City.

Nasikop ang tulo pasado alas-11 sa gabii niadtong Huwebes, Septiyembre 17, atol sa joint operation sa Philippine National Police (PNP), Traffic Enforcement and Management (TEAM), ug City Mayor’s Office-Safety Maintenance Area Response Team (CMO-SMART).

Matud ni CMO-SMART team leader Gerard Glenn “RD” Soon Gobalani sa interview niadtong Septiyembre 18, gisugdan sa ilang team ang surveillance human nakadawat og impormasyon bahin sa mga motorsiklo nga giingong maglumba sa maong dapit.

Nakumpirma sa ilang monitoring nga adunay drag racing nga nahitabo sa maong dalan ini og lawom na kagabhion ug nasuta usab kung asa nagpundo ang mga riders.

Human niini, nakig-coordinate ang CMO-SMART sa PNP ug TEAM aron madakpan ang mga riders.

Matud pang Gobalani balik-balik nga nagbahis-bahis ang maong tulo ka riders sa gikan sa S&R traffic light hangtud sa intersection duol sa Bai Hotel.

Mag-U-turn dayon sila ug mobalik paingon sa S&R area nga magpakusog og padagan.

Sa dihang gikompronta sila sa otoridad giangkon sa mga riders nga sila ang mga nakit-ang nag-apil sa maong kalihokan tungod ana, giisyuhan sila og citation tungod sa reckless driving.

Matud ni Gobalani, kompleto ang mga dokumento sa tulo, lakip ang ilang mga lisensya, maong wala kumpiskaha o i-impound ang ilang mga motorsiklo atol sa operasyon.

Giingon niya nga gikabalak-an sa mga awtoridad ang maong kalihokan tungod kay ang Ouano Avenue usa ka national highway nga adunay regular nga traffic bisan pa sa kagabhion.

“Wala ra nila gi-endanger ang ilahang kaugalingon, ang kuyaw og maka-among,” matod ni Gobalani.

Matod pa niya, kanunay usab nga moagi sa maong lugar ang mga trak, lakip ang flatbed ug dump trucks, nga makadugang sa peligro kung adunay mga motorsiklo nga maglumba-lumba sa highway.

Ang mga riders nanangangkon nga una pa kining higayon nila nga nag-drag racing sa maong dapit. Apan ilang giingon nga nakaapil na sila og racing sa Cordova, diin sab sila nangadakpan kaniadto.

Matud ni Gobalani, gi-describe usab sa mga riders ang ilang gihimo isip usa ka “friendly” run tali sa ilang mga motorsiklo ug dili lumba nga adunay pustahan.  Ang tulo ka riders mga taga-Mandaue City ug Lapu-Lapu City.

Giingon ni Gobalani nga kabahin ang maong apprehension sa padayong pag-monitor sa CMO-SMART dili lang sa Ouano Avenue kondili apil usab sa ubang national highways diin posibleng mahitabo ang susamang kalihokan.

Padayon usab, matod niya, ang surveillance sa CMO-SMART ug ang koordinasyon niini sa PNP, TEAM ug mga barangay, ilabina sa mga lugar diin adunay mga report bahin sa motorcycle racing.

Matud ni Gobalani, adunay executive order nga gipirmahan ni Mayor Thadeo Jovito “Jonkie” Ouano niadtong Septiyembre 15 nga pormal nga nagtudlo sa CMO-SMART sa pag-monitor sa maong mga kalihokan ug pag-coordinate sa mga concerned agencies.

Gi-report usab sa CMO-SMART sa Land Transportation Office (LTO) ang citations nga gihatag sa tulo ka riders.

Matud ni Gobalani, ang citation nagsilbing pahimangno nga ang mga awtoridad karon nagdokumento ug naglihok batok sa mga report sa drag racing, imbes nga verbal warning lamang ang ihatag.

Giduso usab niya ngadto sa mayor ang panginahanglan nga mag-meeting ang mga concerned agencies aron makamugna og mas klarong pamaagi sa pagdumala sa susamang mga kaso, ilabina kung magpadayon ang maong kalihokan.

Gidasig sa CMO-SMART ang mga motorista ug mga establisemento nga i-report sa mga awtoridad ang mga gidudahang illegal racing activities, ilabina kung mahitabo kini sa mga public road ug mahimong mameligro ang ubang motorista ug pedestrian.

Niadtong Septiyembre 10, hapit 20 ka motorsiklo ang giingong nalambigit sa susamang kalihokan sa Cansaga Bridge sa Barangay Paknaan, Mandaue City. – IBM BANAT NEWS