Bayranan sa kuryente mominus kun wad-on ang VAT sa system loss

CEBU, Philippines — Ang pagwagtang sa value-added tax (VAT) sa system loss charges mahimong makapamenos og labing menos P20 sa binuwan nga bayranan sa kuryente sa usa ka kasagarang panimalay, matud ni Energy Secretary Sharon Garin.

Matud ni Garin, ang lakang kabahin sa paningkamot sa gobyerno nga ipaubos ang gasto sa kuryente ug ang kabug-aton sa taas nga presyo niini.

Kinahanglan niini ang koordinasyon sa Philippine National Police, Department of the Interior and Local Government, Department of Information and Communications Technology, local government units, distribution utilities, electric cooperatives, National Electrification Administration ug ubang stakeholders.

Gipahibawo sa BIR ang maong VAT treatment pinaagi sa Revenue Memorandum Circular No. 97-2026 nga gipagawas ni BIR Commissioner Charlito Mendoza niadtong Septiyembre 14, 2026.

Ubos niini, ang allowable system loss charge dili iapil sa gross sales alang sa VAT purposes sa generation companies, National Grid Corporation of the Philippines (NGCP), distribution utilities ug electric cooperatives, basta kini klarong gilain sa electricity bill o invoice.

Ang VAT relief miabot samtang nag-atubang gihapon og taas nga presyo sa kuryente ang mga konsumidor sa Visayas ug Mindanao tungod sa hugot nga power supply.

Niadtong Septiyembre 10, gimando sa Energy Regulatory Commission (ERC) ang regional implementation sa Secondary Price Cap (SPC) sa Wholesale Electricity Spot Market (WESM), retroactive sa August 2026 billing period, human sa talagsaong pagsaka sa presyo sa kuryente.

Misaka hangtod P18,590 kada megawatt-hour ang WESM price sa Visayas ug P19,560 kada MWh sa Mindanao.