Bata nga naanod sa baha patay na nga nakaplagan

CEBU, Philippines — Patay na nga nakaplagan kagahapon sa hapon ang 9-anyos nga bata nga gikatahong naanod sa kusog nga baha ngadto sa Sitio Gawad Kalinga, Barangay Budlaan, Dakbayan sa Sugbo niadtong Martes usab sa hapon.

Base sa taho nga pasado alas 2:00 sa hapon upat ka bata ang nagdula daplin sa sapa sa maong lugar.

Giingong nikanaog sa riprap ang biktima aron kuhaon unta ang bola nga naanod sa baha apan tungod sa kusog sa bul-og sa tubig naanod usab kini.

Gikataho nga kataposang nalantawan ang bata diha dapit sa Grand Mall diin padayon kini nga gianod sa baha.

Dali nga niresponde ang mga sakop sa Cebu City Disaster Risk Reduction and Management Office (CCDRRMO) human madawat ang alarma ug nilusad og search and rescue operation.

Nagpadayon ang pagpangita sa biktima hangtud kagahapon sa buntag ug nakaplagan ang bata nga wala nay kinabuhi diha sa Sitio Toril, Barangay Tingub, Dakbayan sa Mandaue.

Gikompirma usab sa inahan sa bata nga si Rosalie Repaja nga ang nakaplagang patay nga bata mao ang iyang anak.

Padayon pa ang imbestigasyon sa kapolisan sa maong insidente.