Report kabahin sa Monterrazas gipabalik ngadto sa TIC

CEBU, Philippines — Gipabalik sa konseho ngadto sa Technical Infrastructure Committee (TIC) ang report niini kabahin sa Monterrazas de Cebu sa Barangay Guadalupe. Kini aron mapadayon ang dugang teknikal nga pagsusi human nangutana ang mga konsehal sa rekomendasyon nga tugotan nga mopadayon ang proyekto. Atol sa regular nga sesyon niadtong Septiyembre 15, 2026, gihagit ni Bise Mayor Tomas Osmeña ang assessment sa TIC sa kapasidad sa detention ponds ug nanawagan og mas klarong pagtino sa posibleng pagbaha sa proyekto.

Ang TIC miingon nga ang ilang fact-finding dili pa maoy katapusan nga pagdeterminar sa hinungdan sa pagbaha, epekto sa drainage, o responsibilidad sa Monterrazas.  Girekomenda niini nga ipadayon ang kasamtangan ug nagpadayon nga mga proyekto samtang ipadayon sa developer ang flood mitigation measures. Gipadayag ni Osmeña nga ang detention ponds kinahanglan susihon pag-usab base sa grabeng pag-uwan sama sa Bagyong Ruping. Matud pa niya nga ang maong lugar mahimong makamugna og kapin sa 300,000 cubic meters nga runoff, samtang ang report sa TIC nag-ingon nga ang kasamtangang detention capacity anaa sa 62,710.5 cubic meters nga mahimong mosaka ngadto sa 76,230.5 cubic meters kon mahuman ang dugang kapasidad.

Daghang mga konsehal lakip na sila si Konsehal Dave Tumulak, Paul Labra ug Sisinio Andales, nangutana usab nganong girekomenda ang pagpadayon sa proyekto bisan giangkon sa report nga gikinahanglan pa ang dugang teknikal nga imbestigasyon.

Tungod niin, padayon nga nanawagan si Osmeña nga ikonsiderar sa konseho ang pagpagawas og cease-and-desist order hangtud mahuman ang dugang teknikal nga pagsusi sa kapasidad sa detention ponds ug sa drainage system. Sa katapusan, mihimo og mosyon si Konsehal Mikel Rama nga ibalik ang report sa TIC aron matubag ang tanang isyu nga gipanghisgutan ug aron nga mas makakuha og klaro nga rekomendasyon.