Bigbike nadisgrasya sa tunnel

CEBU, Philippines — Usa ka 36-anyos nga lalaki ang namatay human maaksidente samtang nagmaneho sa iyang motorsiklo sa South Road Properties (SRP) Tunnel, Barangay San Roque, Cebu City, kagabhion sa Septiyembre 13,, 2026.

Base sa report sa Traffic Enforcement Unit (TEU) sa Cebu City Police Office, ang insidente nahitabo mga alas-11:57 sa gabii. Ang biktima giila nga si June Diaz Delgra, 36 anyos, residente sa Upper Mohon, Talisay City, Cebu, ug nagmaneho sa itom nga Kawasaki Versys 650 nga adunay plaka nga 219GKR.

Base sa imbestigasyon, gikan sa gasolinahan ang biktima ug paingon sa habagatang direksyon sa SRP kauban si Clent Akhim Fuentes Atad, 18 anyos, nga nagmaneho usab og laing motorsiklo. Si Atad maoy nag-una sa biyahe samtang si Delgra nagsunod kaniya.

Sa dihang nakaabot sila sa medyo kurbadahon nga bahin sa tunnel, misulay og overtake si Delgra sa wala nga bahin. Apan atol sa pag-overtake, nawad-an siyag kontrol sa iyang gimanihong motorsiklo ug paingon sa kilid sa kalsada Tungod niini, naigo siya sa gutter hinungdan sa pag-untol sa motor ug nalabay si Delgra uban sa motorsiklo og pipila ka metro sa karsada. Nakabuhi siya gikan sa motorsiklo ug nahulog sa kalsada, samtang ang motorsiklo mipadayon pa og dagan hangtod mihunong sa layo nga bahin.

Daling gitabang ang biktima gidala dayon ngadto sa Cebu City Medical Center alang sa pagtambal, apan gideklarar siya nga dead on arrival (DOA) ni Dr. Lord Schweitzer Yeitsin Raguro, M.D. mga alas-12:48 sa kaadlawon sa Septiyembre 13, 2026. Mga alas-2:25 sa kaadlawon, miadto sa opisina sa TEU ang igsoon sa biktima nga si Vicente Diaz Delgra aron mokumpirma sa kamatayon ug modawat sa personal nga mga gamit sa iyang igsoon. Padayon ang imbestigasyon sa TEU personnel aron masuta ang tanang detalye sa maong aksidente. — /IBM (FREEMAN)