UV Lancers nagtinguha nga makabangon dayon

CEBU, Philippines —  Ang four-time defending champions University of the Visayas (UV) Green Lancers nanghinaut nga makabarog dayon gikan sa miagi nilang pagkahisukamod sa dihang ilang sangkaon ang University of the Philippines (UP) Cebu Fighting Maroons sa Cebu Schools Athletic Foundation, Inc. (CESAFI) Season 26 basketball tournament karong adlawa (Domingo, Septiyembre 13) sa Cebu Coliseum.

Ang Lancers nakahiagum og makapakurat nga kapildihan,   68-81, sa mga kamot sa University of San Carlos (USC) Warriors sa una nilang duwa niadtong  Agosto 30.

Ang mga batos ni coach Gary Cortes mosuway pagkulit og daog sa dihang ilang banggaon ang UP Cebu sa alas 3:30 sa hapon. Mismo ang Fighting Maroons gikan sab sa mapait nga kaparotan.

Nakalabaw sila og 27 puntos apan sa katapusan gipahagba ra diay sila sa Cebu Institute of Technology-University (CIT-U) Wildcats, 70-71, niadtong Septiyembre 8.

Sa laing engkwentro sa kolehiyo, ang USC Warriors ug ang University of Southern Philippines Foundation (USPF) Panthers buot mobalik sa ensaktong dalan apan ang usa kanila mosukarap na sab human sa alas-5 sa hapon nilang bugno.

Human gipakugangan nila ang Lancers, ang Warriors gilampaso sa   University of Cebu (UC) Webmasters, 63-81.

Ang Panthers mibuntog sa UCLM, 81-76, apan miyukbo sa Benedicto College (BC) Cheetahs, 56-62, sa miaging nilang duwa.

Sa juniors division, ang Cebu Eastern College (CEC) Dragons ug ang University of San Jose-Recoletos (USJ-R) Jaguar   Cubs parehong nagtirada nga inaton ang perpekto nilang sinugdanan ngadto sa 3-0.

Apan usa lamang kanila ang mokab-ot sa ilang misyon human sa alas 12:30 sa hapon nilang pinaksitay.

Ang Dragons mipatigbabaw sa nag-una nilang duha ka duwa batok sa San Carlos School of Cebu (SCSC) Baby Warriors, 75-64, ug USPF Baby Panthers, 67-54.

Ang Jaguar Cubs miabli sa ilang kampanya uban ang 76-35 nga demolisyon sa Don Bosco Technical College (DBTC) Greywolves ug ila kining gisundan uban ang 65-48 nga paglampaso sa  CIT-U Junior Wildcats.

Sa alas-2 sa hapon nga iskedyul, ang UC Junior Webmasters nagtirada og duha ka sagunson nga daog sa dihang makig-atbang sila sa Junior Wildcats.

Ang Junior Webmasters milatigo sa Baby Cheetahs, 61-40, sa una nilang tahas ning season.