Alas Women ‘di uurong sa laban sa Asiad

MANILA, Philippines — Hindi aatras ang Alas Pilipinas Women indoor volleyball team sa mabigat na laban na kanilang haharapin sa pagsabak sa 20th Asian Games sa Aichi-Nagoya, Japan.

Kasama ng Alas Wo­men sa Group C ang defending champion at nine-time gold medalist China at Kazakhstan.

“Ang lalakas talaga ng mga kalaban du’n, so we’re very excited with the level of volleyball that we’ll be exposed to there,” ani team captain Jia De Guzman. “Everyone’s just very optimistic and excited to play.”

Ito ang unang Asiad appearance ng Alas Women sapul noong 2018 edition sa Jakarta, Indonesia kung saan tumapos ang tropa sa pang-walong puwesto.

Kasama si De Guzman sa nasabing grupo bukod kay libero Dawn Macandili-Catindig.

“With the international experience that Dawn and I have, ita-try namin ‘yung best namin i-guide ‘yung mga young players na first time din maglaro doon,” dagdag ng 31-anyos na veteran setter.

Bukod kina De Guzman at Macandili-Catindig, ang iba pang miyembro ng Alas Women ay sina outside hitters: Angel Canino, Bella Belen at Eya Laure, opposite spikers, Alyssa Solomon at Erika Santos, middle blockers Amie Provido, Thea Gagate at Dell Palomata, setter Mars Alba at libero Justine Jazareno.

Si Japanese coach Taka Minowa ang hahawak sa mga Pinay spikers.

Papalo ang women’s volleyball competition ng Aichi-Nagoya Asiad sa Setyembre 16 at magtatapos sa Setyembre 22 sa Okazaki Chuo Sogo Park Gymnasium at Park Arena Komaki.