Ikaupat nga suspek sa kidnap-murder gipangita

CEBU, Philippines — Cebu City Police Office (CCPO) mopadayun pagpangita sa ikaupat nga suspek sa pagdagit ug pagpusil-patay sa usa ka 57-anyos nga lalaki.

Tulo sa upat ka suspek ang nadakpan na samtang gipangita pa ang usa nga nagpabiling gawasnon.

Ang biktima mao si Leo Leaño, 57, residente sa Barangay Nangka, Consolacion. Nakaplagan siyang patay na sa Sitio Morga, Barangay Sudlon 1, Cebu City, niadtong Septiyembre 3, human siya gi-report nga gidagit samtang padulong sa pagtan-aw og sabong.

Matud ni Police Lieutenant Colonel Gerard Ace Pelare, deputy city director for operations sa CCPO nakatabang ang CCTV footage sa pagsubay sa pagdagit ug sa sakyanang gigamit sa pagdala kang Leaño.

Nasubay usab sa mga imbestigador ang gi-rentahang Mitsubishi Mirage G4 pinaagi sa GPS tracking.

Base sa GPS data, miagi ang sakyanan gikan sa Consolacion, ngadto sa SRP, Tabunok ug Manipis sa Talisay City, Campo 7 sa Minglanilla ug Sinsin, sa wala pa moabot sa Sudlon 1 sa Cebu City.

Nakita usab sa sulod sa sakyanan ang mga lama sa dugo. Una nang nadakpan ang alyas Ritchie, 30, usa ka e-bike driver, ug alyas Ace, 49, kanhi seaman nga giingong maoy nagmaneho sa giabangang sakyanan.

Nadakpan usab niadtong Domingo sa gabii si John Elvis Catantan Gutobat, 31, e-bike driver ug residente sa Barangay Pahina Central, Cebu City.

Si Gutobat giila sa kapulisan nga mao ang mipusil kang Leaño kaduha, subay sa mando sa usa ka tawo nga iya lang giila sa alyas nga “Shaun” nga maoy nibayad niya og P10,000.

Giingon usab ni Gutobat nga duha ka adlaw nilang gisundan ang biktima sa wala pa ang krimen. Matud pa niya, human sa krimen  namalik sila sa Barangay Pahina Central gamit ang gi-rentahang sakyanan diin usab niya nadawat ang iyang bayad.

Sa dihang nahibaw-an ni Gutobat nga nadakpan na ang iyang duha ka kauban, miikyas siya sakay og bus padulong sa Daanbantayan pero nibalik siya sa siyudad human gipangalanan siya sa duha apan nadakpan dayun siya.

Ang alyas “Shaun” wala pa madakpi nga maoy matud pa nagmando pagpusil sa biktima ug uban pang makatabang sa imbestigasyon. 

Lakip sa mga anggulo nga gisusi sa kapulisan ang posibleng away sa yuta ug panimalos ngadto sa biktima. Wala pa matino sa kapulisan ang tinuod nga motibo sa krimen.

Si Ritchie giingong giila sa kapulisan nga mastermind ug siya usab ang giingong mipalit sa pisi nga gigamit sa paghigot kang Leaño.

Si Ace, sa laing bahin, giingong nakadawat og P8,500, samtang si Ritchie nakadawat og P7,000 isip bayad sa ilang pagkalambigit.

Kasong Kidnapping with Murder ang ipasaka batok sa mga suspek.—  IBM  BANAT NEWS