CECABA All-Stars mikulit og 3-0 sweep sa unang hugna

CEBU, Philippines — Ang Cebu Eastern College Alumni Basketball Association (CECABA) All Stars mipayaka sa Wednesday Club, 110-102, aron pagkumpleto og 3-0 sweep sa unang hugna sa eliminasyon sa 1st Edgar Cokaliong Memorial Cup Basketball Tournament nga gipaluyohan sa Shell Pilipinas Corporation diha sa Don Edgar Stadium sa Cokaliong Tower.

Si Chester Cokaliong milansang og siyam ka 3-pointers dayon na ngadto sa pagkadlit og 27 puntos samtang si Mark Eugene Bukiron midugang og 25 puntos sa dihang ang mga bitoon sa CECABA nimartsa ngadto sa ikaduhang hugna nga way pildi.

Hait gihapon kaayo sa edad nga 65 anyos, si Cokaliong miposa og upat ka tres, apil ang usa ka buzzer-beater nga mitapos sa unang kuwarter nga nagtuboy sa mga Easternians ngadto sa sayong 30-22 nga labaw, nga ilang giinat ngadto sa 57-45 sa halftime.

Si Harold James Tan mihipos og 12 puntos samtang si Paul Martin Gabatan miamot og 10 puntos alang sa CECABA, nga nakamintinar sa double-digit nilang bentaha sa wala pa mokab-ot og otso puntos nga kadaogan.

Sila si Jonel Camboanga ug Cyfandel Amora nagkumbinar og 59 puntos samtang si Reil Young mitali og 23 puntos apan nakawang ang maanindot nilang salida kay ang Monday Club natagak sa 1-2.

Sa laing duwa, ang Toyota Mandaue North milusad og makapakurat nga pagbalitok sa katapusang 90 segundos aron bughaon ang Monday Hoopers, 81-77.

Ang Monday Hoopers labaw og sayes puntos sa pinal nga 1:30 nga marka ug mainat pa unta gani ni nila ngadto sa otso puntos apan si Jamel Eriso nasipyat sa duha niya ka free throws.

Dinhi na nagsugod ang ilang pagkatibugsok.

Sila si JP Batac ug Dionesio Espinosa nagtambayayong aron paglusad og panapos sa duwa nga 10-0 rally nga ngabitad sa Toyota Mandaue ngadto sa makapakugang nga kadaogan.

Si Batac mibubo og 21 sa iyang 30 puntos sa katapusang kuwarter samtang si Jaypee Gapo mitimbre og 21 puntos alang sa Toyota Mandaue, nga nagbitbit na karon og 2-1 rekord.

Si Eriso miposte og 19 puntos samtang sila si Loling Abella ug Raj Advani mipupo og 17 puntos matag usa apan sa walay kapuslanan kay ang Monday Hoopers padayong nangitlog human sa tulo ka duwa.