Jaguars mikulata sa UCLM alang sa una nilang daog     

CEBU, Philippines — Ang University of San Jose-Recoletos (USJ-R) mitunol ni coach Roger Yap sa una niyang daog sa dihang gilampornas sa Jaguars ang University of Cebu Lapu-Lapu and Mandaue (UCLM), 75-46, sa Cebu Schools Athletic Foundation, Inc. (CESAFI) Season 26 basketball tournament niadtong Huybes sa gabii, Septiyembre 17, sa Cebu Coliseum.

Si Alcher Obra miharos og 23 puntos, pito ka rebounds, duha ka steals, ug usa ka block, samtang si Chan Bennedict Brigoli midugang og 13 puntos, duha ka rebounds, tulo ka assists, duha ka steals, ug usa ka block aron tabangan ang Jaguars pagpakgang sa duha ka sagunson nilang pildi.

Human sa mainit nga sinugdanan, 20-10, ang Jaguars mipugong sa UCLM ngadto lamang sa kuwatro puntos sa ikaduhang kuwarter samtang mibubo og 23 aron pagposte og dakong 43-14 nga bentaha sa halftime.

Ang Jaguars mipadayon sa bangis nilang opensa sa second half aron inaton ang ilang labaw ngadto sa 32 puntos sa naghinapos nga bahin sa duwa.

Hait kaayo ang USJ-R nga mipasud og 27 sa 51 nila ka itsa samtang namugnaw og maayo ang UCLM nga naka-igo lamang og 13 sa 65 nila ka tira.

Si Marty Louisse Sotto mihipos og 12 puntos ug lima ka rebounds alang sa UCLM, nga naparot sa ikatulong higayon sa upat ka duwa.

Sa juniors division, ang Cebu Institute of Technology-University (CIT-U) Junior Wildcats nanginit sa ikaduhang kuwarter ug nakasusinir sa maanindot nilang salida sa nahibiling bahin sa duwa aron ilampaso ang PAREF Springdale School Titans, 88-61.

Ang Junior Wildcats alkansi og usa ka lugas human sa nag-unang 10 minutos sa aksiyon apan milusad og nagbagang 16-3 rally sa tunga-tungang bahin sa ikaduhang kuwarter aron kontrolahon ang duwa uban ang 43-30 nga bentaha human sa first half.

Ang Junior Wildcats miabante og 22 puntos, 63-41 human sa tulo ka kuwarter sa wala pa kini nila gipaburot ngadto sa 32 puntos.

Si Geoffe Vhon Partosa mibirada og 29 puntos ug impresibong mipasud og 11 sa 15 niya ka itsa apil na ang unom sa walo niya ka 3-pointer. Milangkat sab siya og unom ka rebounds, upat ka assists, ug usa ka steal alang sa CIT-U.

Si Vincent Zamora miamot og 13 puntos, siyam ka rebounds, usa ka assist, ug duha ka steals, samtang si Skeril Miez Basilisco midonar og 12 puntos, upat ka rebounds, tulo ka steals, ug tulo ka blocks alang sa Junior Wildcats, nga nagkupot na karon og 2-1 rekord.

Si Riche Sarmiento II  mipaulbo og 30 puntos alang sa Springdale uban ang duha ka rebounds ug duha ka steals, samtang si Anton Lorenzo Gratones mikadlit og 15 puntos, walo ka rebounds, upat ka assists, tulo ka steals, ug usa ka block. Apan nakawang ang ilang paningkamot kay ang Titans nahagba sa ikatulong sunod-sunod nga higayon.