24 wanted timbog sa 1-day warrant drive ng QCPD
MANILA, Philippines — Dalawampu’t apat na wanted persons, kabilang ang anim na Most Wanted Persons (MWPs) at 18 Other Wanted Persons (OWPs), ang naaresto ng Quezon City Police District (QCPD) sa isinagawang one-day warrant drive noong Setyembre 4, 2026.
Sa pamumuno ni QCPD Director PBGen. Christopher Olazo, nagsagawa simultaneous operation upang tugisin ang mga indibidwal na may nakabinbing warrant of arrest at iharap sila sa kinauukulang korte.
Kabilang sa mga naaresto ang 42-anyos na si alyas “Jo”, ang No. 10 District-Level Most Wanted Person, na nasakote ng District Mobile Force Battalion sa Brgy. East Kamias, Quezon City. Nahaharap siya sa kaso dahil sa umano’y paglabag sa Republic Act No. 10591 o Comprehensive Firearms and Ammunition Regulation Act at Batas Pambansa Blg. 881 o Omnibus Election Code.
Nadakip din ng District Anti-Carnapping Unit si alyas “Mac”, 51, dahil sa paglabag sa Anti-Carnapping Law, habang dalawang iba pang wanted persons ang inaresto ng Talipapa Police Station at Kamuning Police Station kaugnay ng mga kasong paglabag sa Republic Act No. 9165 o Comprehensive Dangerous Drugs Act of 2002.
Ayon kay Olazo, patuloy ang QCPD sa pagpapalakas ng mga operasyon laban sa mga puganteng may kinakaharap na kaso upang matiyak na naipatutupad ang batas at naihaharap sa tamang proseso ng hustisya ang mga akusado.
- Latest
