Lola lulan ng bangka, swak sa dagat!
Saradong pinto akala CR
MANILA, Philippines — Matagumpay na nasagip ang isang 62-anyos na matandang babae makaraang aksidenteng mahulog mula sa isang pampasaherong bangka sa karagatan ng Zamboanga City nitong Biyernes.
Kinilala ang nailigtas na matanda na si Norhaida Penyon na nagtamo ng mga galos at bahagyang sugat sa katawan sa insidente.
Nabatid na ang naturang pampasaherong bangka na umalis sa pantalan ng Zamboanga City ay patungong Basilan.
Sa ulat ng Maritime Police at Philippine Coast Guard-Zamboanga, bago ito ay nagtanong umano ang matanda sa isang pasahero kung nasaan ang comfort room.
Sa pag-aakalang comfort room (CR) ang pintuan ng nasabing malaking pampasaherong bangka ay binuksan ito ng matanda habang naglalayag sa pero tuluy-tuloy siyang nahulog sa dagat.
Isang ginoo naman na kinilalang si Ibrahim Luna Edris ang tumalon sa bangka para sagipin ang nalulunod na matanda na matagumpay na naiahon.
Ang matanda ay dinala sa pamahalaang panlalawigan ng Basilan kung saan siya sumailalim sa medical examination bago sinundo ng kaniyang anak na babae na taga Lamitan City.
- Latest
