Nanghulga sa eskuylahan gipangita

CEBU, Philippines — Naghimo og lawom nga imbestigasyon ang Mabolo Police Station 4 sa Cebu City bahin sa usa ka post sa Facebook nga giingong nanghulga og pagpatay sa mga estudyante sa University of Southern Philippines Foundation (USPF)–Lahug Campus niadtong Miyerkules, Septiyembre 2, 2026.

Mga alas 12:56 sa udto, miadto sa USPF–Lahug Campus ang mga personnel sa Mabolo Police Station 4 aron ipahibalo ang maong hulga.

Gipangunahan ang imbestigasyon ni Police Major Jerric Allan M. Arellano ubos sa direktang pagdumala ni Station Commander Police Major Thom Ed L. Taghoy II.

Ang maong post gikatahong gipatik sa Facebook account nga naggamit sa ngalan nga “Nieljon Daculan.”

Human mikaylap ang post, ang tawo nga giila isip tag-iya sa maong account mipahibalo nga dili siya maoy nag-post niini ug na-hacked o nakompromiso ang iyang account. Apan bisan pa niini, gipadayon sa Mabolo Police ang pagberipika ug imbestigasyon aron masuta ang pagkatinuod, tinubdan ug mga sirkumstansiya nga naglibot sa maong hulga.

Nakigkoordinar usab ang kapolisan sa mga opisyal sa USPF aron masusi ang posibleng security concern ug masiguro ang kaluwasan sa mga estudyante, faculty, school personnel ug tibuok school community.

Gipadayon sa Police Station 4 ang koordinasyon sa school administration ug sa mga concerned police unit alang sa tukmang security measures ug gikinahanglang police action.

Samtang, giawhag sa kapolisan ang publiko nga magpabiling kalmado, dili magpakaylap sa mga impormasyon nga wala pa mapamatud-an, ug ireport dayon sa hustong awtoridad ang mga kadudahang o hulga nga mga post sa social media.

Gipasalig sa Mabolo Police Station ang padayong pagresponde sa mga impormasyon nga mahimong hulga sa kaluwasan sa publiko ug ang pagpanalipod sa school community.

Sayo sad aning semanaha, usa ka tinun-an sa Busay National High School sa Barangay Busay, Cebu City nga giingong nanghulga og classmate gamit ang private message ang nasubay sa kapolisan.

Ang maong tinun-an gipaubos na sa interbensyon ug gipasidan-an bahin sa iyang gibuhat nga salaod. (BANAT NEWS)