Pila ang angayang ibayad sa sa-up?

Dear Atty. Divine,

Ang akong mga ginikanan adunay gitikad nga yuta. Kapin sa 60 ka tuig na silang saup ug ang akong tatay namatay na. Si tatay ang nagtanum sa mga lubi sa maong yuta nga ilang gitikad ug karon si nanay na ang nag-atiman sa maong yuta. Ang mga original owners sa maong yuta nga gitikad sa akong mga ginikanan namatay na sab ug ang mga heirs nalang ang nahibilin. Last week, gipahibawo si nanay sa mga heirs nga ilang ibaligya ang property ug aduna na daw silay buyer. Gusto nila nga bayran nalang si nanay ug gitanyagan siya og One Hundred Seventy Thousand Pesos (P170,000.00) isip bayad sa iyang pagka sa-up. Ang akong pangutana kun reasonable ba ang maong kantidad? Daghang salamat.

Lorena

* * *

Dear Lorena,

Basi sa atong balaod, ang mga sa-up kun tenant adunay security of tenure busa dili sila basta-basta nga mapapahawa bisan kun ibaligya pa ang property nga ilang gitikad. Apan kun gitanyagan ang imong nanay nga bayran ug boluntaryo kini niyang dawaton, wa kini kalapasan sa balaod. Busa kun ang imong nanay interesado nga modawat sa offer mas maayo nga mokonsulta siya sa Dept. of Agrarian Reform kon DAR aron iyang masuta kon reasonable ba ang offer nga P170,000.00 isip bayad sa iyang pagka sa-up sud sa kapin sa 60 ka tuig. Kun moingon ang DAR nga ubos ra ang maong kantidad, then mamahimo nga mohimo og counter offer ang imong nanay ngadto sa landlord. Thank you and God Bless. -- Atty. Divine

 Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.