Philippine women’s baseball team babawi sa 2027 World Cup

MANILA, Philippines — Nasukat na ng Philippine women’s baseball team ang lakas ng mga nakatunggali kaya asahang mas magiging maganda ang resulta ng kanilang kampanya sa susunod na edition ng WBSC Women’s Baseball World Cup.

Ayon kay head coach Isaac ‘Saki’ Bacarisas marami silang natutunan at nalaman sa mga nakalaban sa nasabing event na ginanap sa Tainan, Taiwan kung saan ay tumapos sila ng 2-3 record kasama ang 6-0 paglampaso sa Cuba.

Nalasap ng Philippine women’s baseball team ang back-to-back losses sa pagtatapos ng group stage kontra host Chinese-Taipei (8-2) at Venezuela (10-0) kaya naman nabigo sila sa asam nilang umabante sa 2027 Finals sa Rockford, Illinois.

“Nasukat na namin ‘yung kagalingan nila ngayon. Siguro naman by the next time around at alam na rin naman natin ‘yung mga weaknesses nila, makakarating na tayo sa world stage,” sabi ni Bacarisas sa naganap na lingguhang Philippine Sportswriters Association Forum sa Philippine Sports Commission media room kahapon. “I hope sa susunod makabalik tayo.”

Ang ibang miyembro ng team na kasama ni Bacarisas na dumalo sa session na suportado ng San Miguel Corporation, PSC, Philippine Olympic Committee, MILO, at 24/7 sports app ArenaPlus, ay sina captain Veronica Velasco, Martine Francisco, Richelle Toledo, Cassandra Inot, Nichole Padasas, Mharnie Dela Cruz, Mery Ann Ramos, at Chastene Jover.