Bangka lumubog: Kapitan, 7 crew nasagip

MANILA, Philippines — Masuwerteng nakaligtas ang isang kapitan at pito pang crew nang lumubog ang kanilang sinasakyang bangkang de motor matapos na balyahin ng dambuhalang mga alon sa gitna ng karagatan sa sakop ng Looc, Romblon, kamakalawa.

Sa ulat na ipinarating ng Coast Guard Sub-Station Looc at ng Looc Municipal Police Station sa Romblon, habang naglalayag at pabalik na ang mga crew at kapitan ng nasabing bangka sa kanilang Landing Craft Tank (LCT) PMI 3 nang hambalusin sila malakas na hangin at binalya bunsod upang pasukin ang bangka ng tubig hanggang sa lumubog.

Bunga nito ay sinikap ng mga crew at ng kanilang kapitan na lumangoy patungo sa dalampasigan sa Brgy. Punta, Looc kung saan agad naman silang dinaluhan ng mga opisyal ng Barangay at dinala sa Punta Evacuation Center.

Kinabukasan na narekober ang bangkang de motor na MBCA John Michael na nagtamo ng pinsala sa insidente.