Fuente Osmeña Circle ipaubos sa rehabilitasyon

CEBU, Philippines — Posibleng ipaubos og rehabilitasyon ang Fuente Osmeña Circle diin tumong ang pagbutang og modernong pasilidad aron mas mahimong community-centered ang usa sa karaan nga atraksiyon sa Dakbayan sa Sugbo.

Ang Fuente Osmeña Circle natukod niadtong 1910 ug natapos kini niadtong 1912 ug nagpabilin kini nga usa sa mga kabilin sa siyudad.

Magamit ang maong lugar matag Disyembre ug Enero diin anha ibutang sa kagamhanan ang labing dako nga Christmas tree ug adunay ipahigayon nga mga kalingawan hangtud nga mahuman ang Sinulog.

Sa planong rehabilitasyon, butangan kini og playground alang sa mga bata diin adunay slide, swing, climbing structures, seesaw, merry-go-round ug open play areas.

Magbutang usab og fitness area, pampubliko nga mga pansayas, solar-powered nga mga bangko ug outdoor bookshelf aron mas mahimong mapuslanon ug inklusibo ang maong makasaysayanon nga lugar.

Ang outdoor bookshelf mao ang usa sa magdugang sa pagpanindot sa atraksiyon gumikan kay libre nga makahuwam ug makabasa og libro ang publiko.

Ang bookshelf adunay solar-powered string lights aron maglungtad ang kahayag bisan pa sa gabii. Giendorso na sa Department of Engineering and Public Works (DEPW) niadtong Agosto 7, 2026 ang budgetary estimates sa proyekto ngadto sa City Planning and Development Office (CPDO) alang sa posibleng pag-apil niini sa 2027 Annual Investment Program.

Ang maong pag-endorso subay sa hangyo ni Konsehal Rhea Mae Jakosalem niadtong Marso 25, 2026 nga andamon ang Program of Works and Estimates (POWE) alang sa rehabilitasyon sa Fuente Osmeña Circle.

Samtang gisusi pa ang plano, giduso una ni Konsehal Joel Garganera ang maong sugyot ngadto sa Cebu City Historical Affairs Office (CHAO) ug Cebu City Historical and Cultural Affairs Commission (CHAC) aron makahatag og input sa heritage landmark considerations sa dili pa magmugna og disenyo.

Gihangyo usab niya ang DEPW ug CPDO nga isumite ang kompletong Program of Works and Estimates ug detalyadong cost breakdown sa proyekto human namatikdan nga ang attachment nga anaa sa konseho wala maglakip sa budgetary estimates. — /BDB (BANAT NEWS)