Meta nisanong sa awhag ni Hontiveros

CEBU, Philippines —  Nakakuha si Senador  Risa Hontiveros og pasalig gikan sa Meta nga tubagon niini ang mga request sa Philippine law enforcement authorities alang sa user data, ilabina kun adunay nagsingabot nga hulga ug may kalabotan sa mga dili maayong post diha sa ilang social media platform.

Matud pa ni Hontiveros sa gipadala nga press statement nga nagpadala siya og mga representante niadtong Huwebes aron moapil sa Philippine delegation sa mga importanteng opisyal sa gobyerno sa roundtable meeting uban sa mga top Asia-Pacific policy officers sa Meta sa headquarters niini sa Singapore.

Ang miting nagtutok sa responsibilidad sa mga plataporma sa Meta, ilabina ang Facebook, sa pag-atubang sa pagkaylap sa nihilistic violent extremism. Dihang hapit na matapos ang miting nga walay nakab-ot nga kasabutan, gipugos sa mga representante ni Hontiveros ang Meta nga mopasalig sa pagpaambit sa subscriber information ug traffic data ngadto sa Philippine authorities kun adunay mga timailhan sa nagsingabot nga pag-atake.

Miuyon ang Meta sa maong request, sumala pa ni Hontiveros.

“Ngayong mga matataas na opisyal mismo ng Meta na ang nangakong mas magiging maagap sa mga posibleng banta ng karahasan, dapat maging mas mabilis ang aksyon laban dito,” matud ni Hontiveros.

Matud niya, importante ang maong commitment samtang nagpadayon ang Kongreso sa proseso sa pagpasa sa Child Online Safety and Protection Act, nga iyang giila isip priority measure sa gobyerno.

“Mahalaga ‘yan lalo’t isinusulong namin ngayon ang Child Online Safety and Protection Act, isang priority measure ng gobyerno. Mukhang handa naman ang Meta na higpitan ang safeguards nila dahil inabisuhan na namin sila na malapit nang pumasa ang batas na ‘yan,” matud niya.

Ang gisugyot nga balaod nagtukod sa mga safeguards nga anaa sa Republic Act No. 11930, o ang Anti-Online Sexual Abuse and Exploitation of Children (OSAEC) ug Anti-Child Sexual Abuse or Exploitation Materials (CSAEM) Act, nga gi-author ni Hontiveros.

Matud ni Hontiveros, ang mga social media platform kinahanglang manubag sa mga content nga gipakatap pinaagi sa ilang mga plataporma sa Pilipinas.

 “Mahigpit ang bilin ko sa aking staff na hinarap ang Meta: Kailangang linawin sa kanila na hindi pwedeng pinagkakakitaan nila ang mga Pilipino sa Facebook, nang walang pananagutan sa laman nito. We will hold them to their word,” dugang niya. (CEBU NEWS)