SUV na may government markings ipina-impound ng LTO
Dumaan sa EDSA busway
MANILA, Philippines — Ipinag-utos ng Land Transportation Office (LTO) ang pag-impound sa isang SUV na may government enforcement markings matapos umanong gumamit ng plaka na hindi tugma sa rehistradong sasakyan at makitang dumaan sa EDSA Busway.
Ayon kay LTO Chief Markus Lacanilao, inatasan din ang driver ng SUV na isuko ang kanyang lisensya habang isinasagawa ang imbestigasyon sa insidente. Inalarma na rin ang naturang sasakyan.
Pinapaharap ng LTO ang may-ari at driver ng sasakyan sa Intelligence and Investigation Division ng LTO Central Office sa Setyembre 4, 2026 upang magsumite ng paliwanag at mga dokumentong may kaugnayan sa sasakyan.
Hihingan ng ahensiya ng paliwanag ang driver kaugnay ng posibleng paglabag sa paggamit ng maling plaka, paglabag sa traffic signs, at iba pang paglabag na maaaring magresulta sa suspensyon o pagbawi ng lisensya.
Binigyang-diin ni Lacanilao na walang sinuman, kabilang ang mga gumagamit ng sasakyang may government markings, ang maaaring lumabag sa batas trapiko. Patuloy umanong pananagutin ng LTO ang sinumang mapatutunayang lumabag sa mga regulasyon sa kalsada.
- Latest
