Navotas ipinatupad mas mahigpit na cybersecurity
Dahil sa banta
MANILA, Philippines — Nagpatupad ng mas mahigpit na cybersecurity measures ang Pamahalaang Lungsod ng Navotas matapos makatanggap ng impormasyon hinggil sa posibleng banta na maaaring makaapekto sa mga sistema nito.
Sa pahayag ng Navotas LGU, isinasagawa pa ang beripikasyon sa naturang impormasyon habang agad namang inilunsad ang mga hakbang upang mapanatiling ligtas ang mga digital system ng lungsod.
Patuloy ring mino-monitor ng cybersecurity team ng Navotas ang mga system upang matiyak na walang paglabag o hindi awtorisadong pag-access sa mga datos.
Binigyang-diin ng lokal na pamahalaan na pangunahing prayoridad nito ang pangangalaga sa impormasyon ng lungsod, lalo na ang personal na datos ng mga residente.
Hindi pa ibinunyag ng Navotas ang detalye ng posibleng banta o kung may naapektuhang system at datos. Tiniyak naman nitong maglalabas lamang ng opisyal na impormasyon matapos ang masusing beripikasyon.
- Latest
