Mga developer sa Cebu City gisugdan na og inspeksiyon

CEBU, Philippines — Gisugdan na sa kagamhanan sa Dakbayan sa Sugbo ang inspeksiyon sa mga developer kinsa nitubag sa hangyo ni Mayor Nestor Archival, Sr. nga mosumite sa ilang flood mitigation plans aron masuta kong ang subdivision posibleng nakatampo sa pagbaha sa mga ubos nga lugar sa barangay panahon nga mobunok ang uwan. Gipahibalo ni Kenneth Siasar, chief of staff ni Archival nga giuna og inspeksiyon ang Monterrazas de Cebu sa Barangay Guadalupe diin gitan-aw ang pagdagayday sa tubig gikan sa detention ponds sa proyekto kong mopaingon ba sa ubos nga mga lugar sa barangay.

Matud ni Siasar nga ang 24 ka detention ponds sa Monterrazas nga adunay total storage capacity nga 62,710.5 cubic meters gitukod sa terraced nga pamaagi diin ang tubig moagi una sa sunod-sunod nga mga detention pond ug gipaneguro nga dili moawas ang tubig kong dili mapuno ang tanang detention ponds.

Gisusi usab ang Sacred Heart Subdivision sa Barangay Guadalupe gitan-aw kini nga usa sa mga lugar nga nakasinati og pagbaha. Gipadayag ni Siasar nga nisumbong ang mga residente nga nausab ang ilang drainage system sa paglabay sa panahon ug wala usab kini detention pond tungod kay natukod ang subdivision niadtong 1977 o 1978.

Giklaro usab ni Siasar nga ang pagbaha sa Sacred Heart dili pasabot nga gikan mismo sa subdivision ang tanang tubig gumikan kay posible usab nga naapektohan kini sa pagsaka sa tubig baha gikan sa gawas sa subdivision.

Sa pagkakaron, padayon nga giinspeksiyon ang mga developer nga nisumite sa ilang flood mitigation plans nga gilangkuban sa La Paloma, Amari Residences, AppleOne, Urban Deca Homes Phase 1 ug Phase 2, Arcenas Highlands Subdivision, Midlands I ug II, Guadalupe Heights, Guada Verde ug Arcenas Highlands Residences.  Ang buhatan ni Archival nagpadala og suwat hangyo sa 65 ka developers sa habagatang distrito sa siyudad nga mosumite sa ilang flood mitigation plan. 

Apan dili pa tanan ang nakasumite tungod kay adunay developers nga nangayo og paglugway sa deadline aron nga matapok ang ilang mga dokumento.  Si Siasar nagkanayon nga ang City Legal Office na ang mopadala og suwat ug posible nga pahamtangan og legal ng silot kon dili makasumite sa gipangayo nga dokumento ang nahisgutang mga developer. BDB BANAT NEWS