EDITORYAL — DepEd kulang og guidance counselors

Sa kadaghan sa mga pangpublikong eskuylahan sa tibuok Pilipinas nga abot og 45,000, naa ra silay 1,000 ka registered guidance counselors sumala pa na mismo sa Department of Education.

Karon ra ni naukay nunot sa sagunsong mga bayolenteng panghitabo sa sulod sa mga eskuylahan nga gikalambigitan sa mga menor de edad nga mga tinun-an, suspek man o biktima.

Sa usa ka interview sa dzBB, giangkon ni DepEd Undersecretary for Human Resource and Organizational Development Willie Cabral nga padayun pang gipangitaan og pamaagi sa departamento nga masolusyonan kini.

Kaning guidance counselors dili nila sila teaching staff o magtutudlo kondili mga propesyonal gyud nga mga social workers nga nagtuon og sikolohiya partikular sa kinaiya sa mga kabataan.

Ang DepEd nagtinguhang maka-hire og dili momenus 10,000 ka school counselor associates karong tuiga. Ang plano sa DepEd nga matag 250 ka mga estudyante naay usa ka guidance counselor nga makaatiman sa ilang mental health.

Nagpasabot ba kini nga kun ang us aka eskuylahan dunay populasyong 1,000 ka estudyante, kinahanglang naa silay upat ka guidance counselors? Murag dako-dako ni og budget ang gikinahanglan sa DepEd para ani.

Sa pagkakaron, aduna lamang gibanabanang 5,000 ka registered guidance counselors ug dili moabot og 3,000 ka registered psychologists sa tibuok nasud, pero wala kaabot og 1,000 ka registered guidance counselors ang nagtrabaho karon sa DepEd.

Adtong tuig 2020, dunay bakanteng 5,000 guidance counselor positions ang DepEd pero gibanabanang 1,000 lang ang na-hire.

Murag kulang pa tingali ang kampanya sa DepEd pag hire og mga eksperto sama niini. Kada tuig , daghang mga gradwado og kursong Psychology sa mga dagkong unibersidad sa nasud.

Pero tingali, kadaghanan nila dili gustong motrabaho sa DepEd kay tingali gigamayan sa sweldo.

Subay sa Republic Act 12080, o Basic Education Mental Health and Well-being Promotion Act kinahanglan naay mga rehistradong guidance counselors ang mga tunghaan.