Senator-judges giawhag magpabiling patas sa impeachment trial
CEBU, Philippines — Nag-una si Senador Francis “Chiz” Escudero sa unang Senator-Judge Scorecard sa Pulso Intelligence, samtang nanawagan siya sa iyang mga kaubang senator- judge nga magpabiling walay dapig o “cold neutrality” sa impeachment case batok kang Bise Presidente Sara Duterte.
Si Escudero, nga nagdumala sa Senado isip impeachment court, nakakuha og kinatibuk-ang iskor nga 2.92 gikan sa 3.00 sa nationwide survey nga gihimo niadtong Agosto 15 hangtod 16.
Nanguna siya sa tulo ka aspeto nga gisukod sa Pulso Intelligence, diin nakakuha siya og 2.89 sa trust, 2.95 sa performance ug 2.89 sa fairness.
Gipadayag niya kaniadto nga ang pagtangtang sa usa ka napiling opisyal sa katungdanan usa sa “pinakagrabe nga aksyon” nga mahimo sa usa ka constitutional democracy. Nanawagan siya nga ang tanan nga nalambigit sa kaso molihok uban ang pag-amping, pagkamabinantayon ug walay pagduhaduha nga pagkapatas.
Gipahimangnoan usab ni Escudero ang mga senador-hukom, prosecutors ug defense lawyers batok sa paghatag og publikong komento bahin sa merito sa kaso, ug gipadayag ang panginahanglan nga sundon ang “cold neutrality of an impartial judge.”
Sa Pulso scorecard, ikaduha si Sen. Christopher “Bong” Go nga adunay 2.86, gisundan ni Alan Peter Cayetano nga 2.85, Bam Aquino nga 2.82 ug Robin Padilla nga 2.81.
Sa ubos nga bahin sa ranggo mao sila Joel Villanueva nga 2.44, Migz Zubiri nga 2.48, JV Ejercito nga 2.51, Tito Sotto nga 2.56 ug Erwin Tulfo nga 2.56.
Base usab sa survey, 49 porsiyento sa mga respondent mas midapig sa pag-acquit kang Duterte, samtang 34 porsiyento ang pabor sa guilty verdict ug 17 porsiyento ang nagpabiling neutral. (BANAT NEWS)
- Latest
