Tsino nagpanggap na Pinoy, kalaboso

MANILA, Philippines — Inaresto ng Bureau of Immigration (BI) Intelligence Division ang isang 33-taong gulang na Tsino na umano’y nagkunwaring mamamayang Pilipino.

Ang suspek, na kinilala lamang ng BI bilang alyas “Lin,” isang 33-taong-gulang na mamamayang Tsino, ay dinakip ng mga operatiba ng intelligence division ng BI sa Ninoy Aquino International Airport Terminal 1 pagkarating nito mula sa China sakay ng isang Xiamen Airlines flight.

Ang operasyon ay nag-ugat sa impormasyong nakalap ng BI, na nagpakilala sa babaeng Tsino bilang ang taong umano’y gumagamit ng pagkakakilanlang Pilipino na “Lin”.

Pagdating niya, nagsagawa ng beripikasyon at imbestigasyon ang mga tauhan ng BI intelligence at kinumpirma ang kanyang pagkakakilanlan gamit ang kanyang Chinese passport na may pangalang Tsino.

Si Hou ay naaresto dahil sa umano’y maling re­presentasyon at pandaraya na lumalabag sa batas ng imigrasyon ng Pilipinas, pati na rin sa pagiging itinuturing na isang hindi kanais-nais na dayuhang mamamayan.

Si alyas “Lin” ay nasa kustodiya na ngayon ng BI at mananatili sa loob ng holding facility nito habang nahaharap sa mga kasong deportasyon sa imigrasyon.