70 ka tawo nawad-ag balay tungod sa sunog

CEBU, Philippines — Unom ka balay ang nangasunog ug kapin 70 ka tawo ang naapektuhan sa sayo sa buntag nga sunog sa Sitio Kiosko, Barangay Basak San Nicolas, Cebu City niadtong Biyernes, Agosto 21, 2026.

Gibanabana sa Cebu City Fire Station nga mokabat sa P225,000 ang danyos ug tulo ka tawo ang naangol sa insidente.

Basi sa initial report ni SFO1 Fulbert A. Navarro, fire arson investigator sa Cebu City Fire Station, giimbestigahan pa ang posibleng hinungdan sa sunog , apan naay niingon nga nagsugod ni gikan sa likod sa refrigerator.

Gitan-aw usab sa mga imbestigador ang posibilidad nga faulty electrical wiring ang hinungdan sa sunog.

Alas-4 sa kaadlawon naabot ang mga bombero sa lugar alas-4:05 sa buntag. Nakontrol ang kalayo alas-4:45 ug gideklarar nga fire out alas-5:59 sa buntag.

Wala ray namatay apan naay tulo ka tawo nga naangol. Usa kanila ang gitambalan tungod sa paso, samtang ang duha pa nasamad tungod sa buak nga mga bildo.

Sumala sa report sa Barangay, mokabat sa 21 ka pamilya o hapit 70 ka indibidwal ang naapektuhan sa sunog, lakip ang mga residente ug mga nag-abang sa maong lugar. Apan posible pang mosaka ang ihap kung mahuman ang beripikasyon.

Nagbutang ang barangay og 10 ka modular tents sulod sa gymnasium sa Sitio Kiosko aron mahimong temporaryong kapuy-an.

Gihatagan usab ang mga apektadong pamilya og food packs gikan sa Department of Social Welfare and Services (DSWS), samtang nanghatag ang barangay og mga sinina nga gidonar alang sa mga residente nga nawad-an sa ilang mga gamit.

Matud sa report sa barangay, ikaupat na kini nga insidente sa sunog nga natala sa barangay. Nanawagan usab ang barangay og tabang gikan sa Cebu City Government ug uban pang concerned agencies aron matabangan ang mga pamilyang naapektuhan sa insidente.  — IBM BANAT NEWS