EDITORYAL - Disiplina, anha magsugod sa balay

Daghang niisa ang mga kilay ug gisaway dayun si Palace Spokesperson Atty. Claire Castro tungod sa bag-ohay lang niyang pamahayag kabahin sa mga magtutudlo may kalabotan karon sa kinaiya ug pamatasan sa mga kabataan.

Giulan og mga pagsaway ang tigpamaba sa Palasyo tungod nisimpatiya sila sa kahimtang sa mga magtutudlo. Gani, niabot pa gyud sa punto nga naay pipila ka mga iladong mga personalidad nga nipadayag gyud sa social media sa ilang kasuko ngadto kang Castro kay matud pa lagi nasobrahan rad aw kini.

Pero kung buot tan-awon, paminawon ug basahon og maayo ang orihinal nga giestorya ni Castro, wala siya moingon nga tanang mga magtutudlo kondili dunay pipila o dunay ubang magtutudlo—maoy iyang gipasabot.

May kalabotan ni sa mga panghitabo karon nga daghan sa mga bata ang wala nay maayong pamatasan ug kulang na sa disiplina bisan gani sa pagrespeto sa mga mas maguwang kanila ug sa mga otoridad.

Pero kung sa balay palang gani wala tarunga og disiplina sa mga ginikanan ilang mga anak, labaw nang dili sila madisiplina sa mga magtutudlo.

 Samot na kun ang mga magtutudlo madungog sa mga estudyante nga maghisgot og dili maayo bahin sa gobiyerno o may gidapigang politiko.

Gani , pipila ka bulan na ang nilabay sa dihang nibisita si Presidente Ferdinand Marcos Jr. sa usa ka eskuylahan didto sa Davao, samtang galakaw ug gakaway-kaway pagtimbaya ang presidente sa mga batang tinun-an sa elementarya, naay uban sa mga bata ang nagsige og singgit og “BBM Bangag!, BBM Bangag!”

Bisan kinsang tawo nga makakita ug makadungog niini makahunahuna ug makapangutana gyud kun giunsa man pagtudlo kaha sa mga magtutudlo ning ilang mga tinun-an nga makaako man og bugal-bugal sa maong paagi, diha pa gyud mismo atubangan sa labing gamhanang opisyal sa nasud.

Una sa tanan, ang disiplina sa mga bata magsugod gyud sa ilang pagka-anak sa mga ginikanan. Wala gasugod sa mga magtutudlo ang unang disiplina nga angay makat-unan sa mga anak.

Sa panimalay sila tudloan pagtahod sa mga katiguwangan ug mga magulang sa ilang edad; pagtahod ug kahadlok sa Ginoo; pagtahod ug pagsunod sa balaod ug sa mga opisyales nga nagrepresentar sa gobiyerno, pagtahod sa ilang mga magtutudlo ug uban pa.