Ateneo shooter na ‘brainwash’ ng Roblox - Remulla

MANILA, Philippines — Naniniwala si Interior and Local Government Secretary Jonvic Remulla na posibleng naimpluwensiyahan ng online games na Roblox ang Grade 9 student na namaril sa Ateneo de Zamboanga University noong Agosto 18.

Ayon kay Remulla, ito ang nakita ng Philippine National Police (PNP) sa kanilang imbestigasyon sa kaso kung saan dalawang estudyante ang nasawi kabilang ang suspek.

Ani Remulla, wala umanong nakitang bullying, alitan o sabwatan na maaaring nagtulak sa estudyante na gawin ang pamamaril. Wala rin umanong kakaibang pag-uusap na nakita sa kanyang mga social media account, habang patuloy ang forensic digital examination sa kanyang mga gadget.

Dumaan ang estud­yante sa PWD entrance kaya hindi na ito dumaan pa sa security check at nailusot ang baril ng kanyang ama sa loob ng kanyang bag.

Pinag-aaralan din posibilidad sa pagbabawal sa ilang first-person shooter games, kabilang ang Roblox, na nakakapag impluwensiya ng karahasan sa mga kabataan.