Ombudsman may 28 hawak na testigo vs Romualdez

MANILA, Philippines — Ipinahayag ng Office of the Ombudsman na mayroon pa itong 28 testigo na nakahandang magbigay ng direkta at materyal na impormasyon kaugnay ng pagkakadawit ni dating House Speaker Martin Romualdez sa umano’y anomalya sa flood control projects.

Ang pahayag ay inilabas matapos bawiin ni Orly Guteza, dating sundalo, ang kanyang naunang testimonya kung saan idiniin niya si Romualdez sa umano’y male-maletang pera.

“Hindi bago ang recantation sa mga high-profile case. Classic pressure tactic ito. Hindi umiikot ang buong imbestigasyon sa iisa o kahit sa iilang witnesses,” ayon sa Ombudsman.

Ayon sa abogado ni Romualdez na si Atty. Ade Fajardo, magsusumite sila ng supplemental counter-affidavit kalakip ang sworn statements ng 25 dating drivers at security aides ni ex-Rep. Zaldy Co.

“They have come forward and directly contradicted the earlier accounts of the 18 Maleta Boys presented by Atty. Baligod,” ani Fajardo.

Giit ng mga bagong testigo, walang naganap na anumang delivery ng pera sa sinumang pulitiko o opisyal ng gobyerno, kabilang si Romualdez. Hinikayat lamang umano silang sumali sa grupo ng mga testigo kapalit ng pera.

Dagdag pa ni Fajardo, ang pagbawi ni Guteza ay patunay kung paano siya pinilit na idiin si Romualdez.