DBM mipagawas og P9.753 bilyon ngadto sa CHED
CEBU, Philippines — Ang Department of Budget and Management (DBM) mipagawas og P9.753 bilyon ngadto sa Commission on Higher Education (CHED) aron matubag ang kakulang sa pundo ubos sa Free Higher Education (FHE) Program sa 108 ka state universities and colleges (SUCs) sa tibuok nasud.
Ang pundo naglangkob sa napamatud-ang wala mabayri nga mga obligasyon alang sa Academic Years 2022–2023, 2023–2024, ug 2024–2025. Ang CHED, pinaagi sa Unified Student Financial Assistance System for Tertiary Education (UniFAST), maoy mopadali sa pagpagawas sa pundo ngadto sa mga apektadong SUCs.
Matud ni DBM Acting Secretary Kim Robert C. De Leon, ang pagpagawas sa pundo nagpakita sa padayong paghatag og prayoridad sa edukasyon sa administrasyong Marcos, samtang gisiguro ang responsableng pagdumala sa limitado nga resources sa gobyerno.
“Every peso in the national budget has competing demands. Our responsibility is to make sure that limited government resources are directed where they are most needed, without compromising other equally important programs and services,” matod ni De Leon.
Matud niya, ang hapit P10 bilyon nga pundo makatabang sa pagpagaan sa pinansyal nga kabug-aton sa mga SUCs nga kaniadto migamit sa ilang kaugalingong resources aron matubag ang mga gasto alang sa FHE.
Ang dugang pundo mahimong magamit sa mga SUCs alang sa academic ug research programs, student services, laboratoryo, library, information technology resources, ug mga pasilidad sa pagkat-on.
Ang FHE Program gitukod ubos sa Republic Act No. 10931, o Universal Access to Quality Tertiary Education Act, nga naghatag og libreng tuition ug uban pang school fees sa mga SUC ug CHED-recognized local universities and colleges.
Matud ni De Leon, ang pagpagawas sa pundo nagpakita usab sa paningkamot sa gobyerno nga igahin ang public funds base sa anaa nga fiscal space, legal authority, kaandam, ug pagkadinalian sa nagkalain-laing nasudnong panginahanglan. (BANAT NEWS)
- Latest
