Cebu City mosusi sa flood mitigation facilities sa 65 ka developers

CEBU, Philippines — Susihon sa kagamhanan sa Dakbayan sa Sugbo ang flood mitigation facilities sa 65 ka developers nga anaa sa bukirang barangay sa habagatang bahin sa siyudad karong Agosto 27, 2026 aron masuta kong aduna ba kini igo nga detention ponds aron mapugngan ang pagbaha sa siyudad.

Ang maong lakang subay kini sa pagbaha nga niigo sa pipila ka bahin sa siyudad human sa kusog nga pag-uwan.

Si Kenneth Siasar, chief of staff ni Mayor Nestor Archival, Sr. ang inspeksiyon subay sa direktiba sa mayor aron masuta kong unsa kadaghan ang tubig-uwan ang naggikan sa mga development sa bukid ug kon aduna ba kini natampo sa pagbaha sa mga ubos nga bahin sa mga barangay.

Nagpadala ang buhatan sa mayor og mga sulat sa 65 ka developers aron pasumitehon sa ilang mga plano alang sa detention ponds ug uban pa’ng flood-mitigation measures sa ilang mga subdivision o kompaniya.

Matud ni Siasar nga buot usab nga masabtan sa kagamhanan kong asa paingon ang tubig nga dili na masuyop sa yuta tungod kay sementado na ang mga lugar isip og pagpalambo sa mga bukid nga bahin sa siyudad.

Ang deadline sa pagsumite sa plano natapos kini kagahapong adlawa.

Kadaghanan sa developers nakasumite na sa ilang mga dokumento apan wala makahatag si Siasar sa gidaghanon sa developer nga nakasumite na.

Ug kong madawat na sa kagamhanan ang mga dokumento makigtagbo kini sa mga developer sa mosunod nga semana sa dili pa ipahigayon ang actual nga inspeksiyon sa Agosto 27, 2026.

Sa ipahigayon nga inspeksiyon, itakdo ang dokumento ngadto sa actual nga kahimtang sa yuta.

Susihon kong anaa ba gyud ang giplano ug kasamtangang detention ponds ug uban pa’ng flood-control facilities.

Kong dili magtakdo ang dokumento ug ang tinuod nga kahimtang sa development, iduso kini ngadto sa City Legal Office alang sa legal nga evaluation.

Gipasabot niya nga istrikto ang administrasyon sa pagpatuman sa mga lagda apan kinahanglan gihapon nga adunay lig-on nga basehan sa dili pa magpatuman og legal nga aksyon batok sa mga makalapas nga developer.

Dugang pagpasabot ni Siasar nga ang inspeksiyon sa 65 ka developers maghatag sa kagamhanan og mas klarong hulagway kong igo ba ang kasamtangang lakang sa pangontra sa baha sa kabukiran ug kong nagsunod ba ang developers sa mga plano ug pasalig nga ilang gisumite sa siyudad. (BANAT NEWS)