Senador Ejercito misuporta sa mass transit alang sa Cebu

CEBU, Philippines — Gipadayag ni Senador Joseph Victor “JV” Ejercito nga kinahanglan paspason sa Cebu ang pagpalambo sa mass transportation system ug tapuson ang wala pa mahuman nga mga proyekto sa flood control aron matubag ang problema nga dala sa paspas nga urbanisasyon.

Si Ejercito, sa usa ka press conference sa Cebu City bag-ohay lang, miingon nga iyang suportahan ang mga plano sa Cebu alang sa mass transit, bisan kung Bus Rapid Transit (BRT) o Light Rail Transit (LRT) ang pilion sa probinsya.

Matud niya, ang paspas nga paglambo sa Cebu miresulta sa nagkagrabeng traffic congestion ug dili na igo nga dugangan lang ang mga dalan aron ma-accommodate ang nagkadaghan nga mga sakyanan.

“With rapid development, 5,000, 10,000 new cars again every year. Wala na, hindi na tayo aabangan dito. Kailangan natin mass transit na,” matud niya.

Dugang pa sa senador nga kinahanglan magkauyon ang Cebu kung BRT ba o LRT ang ipadayon aron makalihok na ang gobyerno sa proyekto.

“We need mass transit for Cebu in the long run. Wala na tayong enough roads,” matud niya, ug dugang pa niya nga iyang suportahan ang BRT o LRT basta ipadayon sa Cebu ang mass transport system.

Gisuportahan usab niya ang pagpadayon sa Metro Cebu Expressway, nga gilauman nga magkonektar sa Naga City sa habagatan ngadto sa Danao City sa amihanang Cebu.

Matud ni Ejercito, dako ang panginahanglan sa Cebu og bypass roads tungod sa padayong pagtaas sa populasyon ug urbanisasyon nga nakadugang sa traffic.

Bahin sa pagbaha, matud ni Ejercito nga kinahanglan unahon sa gobyerno ang pagkompleto sa wala pa mahuman nga flood control projects imbes nga magsugod dayon og bag-ong mga proyekto.

Lakip na ang pag inspection sa kasamtangang mga proyekto aron mailhan ang mga kakulangan ug tapuson kini aron epektibong malikayan ang pagbaha.

Matud niya, kinahanglan una nga mahuman ang tanang ongoing ug wala pa mahuman nga flood control projects sa dili pa ipadayon ang bag-ong konstruksyon.

Matud ni Ejercito, kini nga pamaagi makatabang usab sa pagpanalipod sa binilyon ka pesos nga nagasto na sa flood control infrastructure ug pagsiguro nga ang mga nahuman nga proyekto magamit na.

Ang iyang gisugyot nga master plan alang sa imprastraktura ug national development makatabang aron masiguro nga ang dagkong mga proyekto ibase sa long-term. — /MEL (BANAT NEWS)