Illegal recruiter nasikop sa NBI

CEBU, Philippines — Nadakpan sa National Bureau of Investigation-Cebu District Office (NBI-CEBDO) ang usa ka babaye nga gipasanginlang illegal recruiter nga nibiktima og tulo ka babayeng gipasaligan niya og trabaho isip housekeeper sa nasud sa Armenia.

Ang tulo ka gi-recruit nga babaye maoy unang nasakpan sa mga personnel sa Bureau of Immigration (BI) samtang padung sila molarga agi sa Mactan-Cebu International Airport.

Apan atol sa pagproseso sa ilang flight nagduda ang mga otoridad nga posibleng biktima sila sa human trafficking hinungdan nga gipugngan sila ug wala palargaha.

Giila ni NBI-CEBDO chief Arnel Pura ang suspek nga giingong ni-recruit kanila nga mao si Mayeth Tacocong Gatchalian. Gidakop siya diha sa Richwood Subdivision sa lungsod sa Compostela, Cebu, niadtong Agosto 27, 2026.

Matud ni Pura, ang tulo ka babayeng biktima nag edad og 20 hangtod 30 anyos. Giingong molarga una sila padung sa Hong Kong niadtong Agosto 26  isip mga turista apan didto sila mogikan padulong ngadto sa Armenia.

Giingong gitanyagan sila sa suspek og trabaho isip housekeeper didto sa Armenia nga adunay gisaad nga sweldo nga P37,000 kada bulan.

 Basi sa balaod, ang recruiter kinahanglang rehistrado sa Overseas Workers Welfare Administration (OWWA) ug uban pang hingtungdang ahensiya sa gobiyerno.

Giingong giandam ni Gatchalian ang ilang mga tiket, hotel accommodation ug itinerary sa Hong Kong. Ang iyang pag-asikaso, bugti sa bayad.

Matud ni Pura, adunay round-trip tickets, hotel bookings ug travel itinerary ang mga babaye nga nagpakita nga turista kuno sila sa Hong Kong.

Apan sumala sa NBI, ang maong travel arrangements gigamit lamang isip pretext o pagtabon sa tinuod nilang katuyoan sa pagbiyahe.

Nasayran usab sa NBI nga nagtrabaho kaniadto si Gatchalian isip contract worker sa Armenia. Apan wala pa matino sa mga imbestigador kung dugay na ba siyang nalambigit sa recruitment activities.

Human makuha sa mga awtoridad ang impormasyon sa nahimutangan sa suspek, gilusad sa NBI-CEBDO ug NBI-Central Visayas Regional Office ang hot pursuit operation.

Alas 8:30 sa gabii niadtong Agosto 27 nadakpan si Gatchalian sa Compostela ug gidala sa NBI office alang sa booking, fingerprinting ug pagkuha sa litrato.

Niadtong Septiyembre 1, 2026, gisang-at batok kang Gatchalian ang mga kaso sa qualified trafficking in persons ubos sa Section 4(a) sa Republic Act 9208 o Anti-Trafficking in Persons Act of 2003, nga gi-amendar, in relation to Section 6(c), ug large-scale illegal recruitment ubos sa Section 5 sa Republic Act 10022 diha sa Office of the City Prosecutor sa Mandaue City ug miagi sa inquest proceedings.

Sa dihang gipangayo ang iyang habig bahin sa kaso, midumili si Gatchalian nga mohatag og pamahayag sa media.— IBM  BANAT NEWS