Nagtugway sa kabaw gipusil

CEBU, Philippines — Naangol ang usa ka 35-anyos nga mag-uuma human gipusil sa iyang kaubang mag-uuma sa Barangay Cantularoy, Sibonga, Cebu, alas-7:33 sa gabii niadtong Biyernes, Agosto 14, 2026.

Ang biktima giila sa alyas nga “Raymond,” 35, residente sa Purok 1, Barangay Cantularoy, samtang ang suspek giila sa alyas nga “Eloy,” 22, mag-uuma ug residente sa Barangay Duguan, Sibonga.

Sumala sa Sibonga Municipal Police Station, nakadawat sila og report gikan sa usa ka concerned citizen bahin sa pagpamusil sa maong lugar.

Base sa inisyal nga imbestigasyon ug pamahayag sa biktima, giguroy ni Raymond ang iyang kabaw paingon sa lunangan dihang kalit siyang gipusil ni Eloy gamit ang wala pa matino nga kalibreng armas ug naigo kini sa wala nga bukton.

Dali nga gidala si Raymond sa Carcar District Hospital alang sa medikal nga pag-atiman. Samtang, sa pagsubay sa kapulisan, nahibaw-an nga posibleng may kalabotan sa personal nga panagbangi ang pagpamusil.

Gikatahong nasuko si Eloy kang Raymond human giingnan niini ang amahan sa suspek nga pasakaan siya og reklamo sa barangay bahin sa gihulman niyang motor nga wala giuli.

Human sa pagpamusil, mikagiw ang suspek ug padayon siyang gipangita sa kapulisan.  Sa pikas bahin, nadakpan ang usa ka 34-anyos nga wanted person human ma-serve ang warrant of arrest batok kaniya sa Barangay Jampang, Argao, Cebu, alas-9:00 sa buntag niadtong Agosto 15, 2026.

Sa pagpatuman sa warrant, narekober sa mga pulis ang usa ka .45-caliber Colt pistol nga adunay magazine nga kargado og tulo ka bala.

Ang warrant gi-isyu niadtong Hunyo 8, 2026 ug gipirmahan sa Presiding Judge sa Regional Trial Court Branch 26 sa Argao, Cebu, tungod sa paglapas sa Republic Act No. 10591 o Comprehensive Firearms and Ammunition Regulation Act.

Pag-abot sa mga personnel sa Argao Municipal Police Station sa pinuy-anan sa wanted person, nakit-an nila kini nga natulog sa duyan ug didto giserbisyuhan ang warrant.