30,000 nakapalit sa tag P20/kilong bugas

CEBU, Philippines — Kapin 30,000 ka residente ang nakapalit og bugas sa P20 kada kilong bugassa  rice program sa Lapu-Lapu City gikan sa 7,414 ka sako na nga ilang nabaligya o napanghatag sukad gilusad ang programa.

Base sa datos sa city government, 30,344 ka benepisaryo ang natabangan sulod sa 84 ka adlaw, hangtod Hulyo 8, pinaagi sa programa nga gipatuman kauban ang Food Terminal Incorporated (FTI) ug Department of Agriculture (DA).

Sa kinatibuk-ang ihap, 4,414 ka sako ang gibaligya pinaagi sa direct consumer sales sa FTI, nga nakaserbisyo sa 15,313 ka residente sulod sa 55 ka adlaw sa pagpamaligya.

Laing 3,000 ka sako ang gipanghatag sa city government ngadto sa 15,031 ka benepisaryo sa 29 ka barangay sulod sa 29 ka adlaw.

Unang gilusad ang programa niadtong Marso 26 pinaagi sa Kadiwa Pop-up Store sa City Hall grounds, diin unang gi-prayoridad ang mga senior citizen ug solo parent. Gi-relaunch kini niadtong Mayo 11 pinaagi sa pakigtambayayong sa FTI ug DA, ug gilakip na usab ang persons with disabilities, 4Ps beneficiaries, fisherfolk ug indigent residents isip mga kwalipikadong benepisaryo. Ang matag kwalipikadong benepisaryo mahimong makapalit og hangtod 10 ka kilo nga bugas sa presyo nga P20 kada kilo.

Ang city government nigahin usab og dugang P3 milyon gikan sa General Fund alang sa pagpalit og bugas aron madugangan ang suplay gikan sa FTI.

Gigamit ang maong pundo sa pagpalig-on sa barangay-level distribution, lakip na sa mga barangay sa mainland ug mga isla.

Ang programa nagpadayon samtang ang gobyerno naghatag og subsidized rice sa mga kwalipikadong sektor tungod sa taas nga presyo sa mga pagkaon.

Si Mayor Ma. Cynthia “Cindi” King-Chan miingon nga kaniadto ang programa gitumong aron mas mapalit sa mga residente ang bugas sa mas barato nga presyo.

Matud sa city government, magpadayon ang programa alang sa mga kwalipikadong benepisaryo pinaagi sa mga scheduled distribution sa mga barangay.