Pito ka police units gipasidunggan sa PRO-7

CEBU, Philippines — Giila sa Police Regional Office 7 (PRO7) ang pito ka police units isip best-performing units sa Central Visayas alang sa Hulyo tungod sa ilang maayong performance sa police operations, crime prevention ug pagtuman sa ilang mga katungdanan.

Ang binulan nga pag-ila gipangulohan ni PRO7 Regional Director Police Brigadier General Arnold E. Abad isip paagi sa paghatag og pagpasalamat sa mga police unit nga nakapakita og maayong performance, pagdasig sa mga personnel ug pagpalig-on sa ilang welfare.

Nakakuha sa Best Police Provincial Office ang Cebu Police Provincial Office, samtang ang Lapu-Lapu City Police Office maoy giila isip Best City Police Office.

Ang Talisay City Police Station maoy nakadaog isip Best Component City Police Station, samtang ang Consolacion Municipal Police Station, San Francisco Municipal Police Station ug Calape Municipal Police Station maoy napili isip Best Municipal Police Station alang sa Class A, Class B ug Class C, matag usa.

Samtang ang Waterfront Police Station 3 sa Cebu City Police Office maoy nakakuha sa Best City Police Station nga kategoriya.

Base sa PRO7, gipili ang mga police unit pinaagi sa gitakdang performance parameters nga naglakip sa ilang operational accomplishments, paningkamot sa crime prevention ug crime solution, pagtuman sa mga mandated functions, ug uban pang indicators nga nagtan-aw sa pagkaepektibo, episyente ug responsive sa ilang police service.

Gidayeg ni Abad ang mga nakilalang units tungod sa ilang dedikasyon, propesyonalismo ug padayong paningkamot sa pagtuman sa ilang mga katungdanan.

Matud ni Abad, ang pag-ila dili lamang usa ka award kondili paagi usab sa pagpasabot sa mga personnel nga nakita ug gipabilhan ang ilang kakugi, dedikasyon ug mga sakripisyo sa pagpanalipod sa komunidad.

Gipasabot usab sa regional director nga ang pag-ila sa maayong performance makatabang sa pagpalig-on sa morale sa mga police personnel ug sa kinatibuk-ang performance sa organisasyon.

Matud niya, ang maong inisyatiba makadasig sa mga personnel nga ipadayon ang maayong performance ug makadasig usab sa ubang units nga maningkamot pa aron mas mapaayo ang ilang mga accomplishment ug serbisyo ngadto sa publiko.

Gawas niini, ang binulan nga recognition gitumong usab sa pagpalambo sa professional growth, welfare ug motivation sa mga police personnel, samtang gipalig-on ang kultura sa excellence, accountability ug continuous improvement sulod sa PRO7.

Kabahin usab kini sa pagsuporta sa 5-Focused Agenda ni Chief, PNP Police General Jose Melencio C. Nartatez Jr., lakip ang panawagan alang sa “Bagong PNP Para sa Bagong Pilipinas: Serbisyong Mabilis, Tapat, at Nararamdaman.”

Sumala sa PRO7, ipadayon niini ang binulan nga pag-ila ug uban pang mga inisyatiba nga nagtumong sa pagpalig-on sa police personnel ug paghatag og mas matinud-anon, episyente ug responsive nga serbisyo sa publiko sa Central Visayas.