Motor nasaghiran, angkas patay
CEBU, Philippines — Patay ang 28-anyos nga back rider samtang naangol ang driver sa motorsiklo human sila ma-sideswipe sa nag-overtake nga Isuzu Traviz sa S. Osmeña Jr. Boulevard, Barangay Mabolo, Cebu City, alas 9:01 sa buntag niadtong Biyernes, Agosto 14, 2026.
Giila sa kapulisan ang biktima nga si Dubhe Glayr Gador, 28, residente sa Barangay Jagobiao, Mandaue City. Gidala siya sa Cebu City Medical Center (CCMC), apan gideklarar nga dead on arrival.
Ang motorsiklo gimaneho ni Silvino Bentoy, 64, residente sa Barangay Basak, Cebu City, samtang ang Isuzu Traviz gimaneho ni Joel Lumasag, 47, residente sa Barangay Tisa, Cebu City.
Base sa imbestigasyon sa Traffic Enforcement Unit sa Cebu City Police Office, lakip ang CCTV ug dashcam footage nga nakuha sa Cebu City Transportation Office, parehas nga nagpadulong sa direksyon sa may Robinsons Galleria ang duha ka sakyanan.
Matud pa sa kapulisan, mibalhin paingon sa wala nga bahin sa dalan ang motorsiklo samtang nag-overtake ang Isuzu Traviz, hinungdan nga na-sideswipe niini ang motorsiklo.
Tungod sa kakusog sa impact, natumba sa dalan ang motorsiklo uban sa duha ka nagsakay niini ug naligsan sa Isuzu Traviz si Gador human natumba sa dalan. Mitubag sa insidente ang mga personnel sa Cebu City Disaster Risk Reduction and Management Office ug Cebu City Transportation Office ug gidala si Gador sa CCMC, diin siya gideklarar nga dead on arrival.
Samtang gikustodiya sa kapulisan si Lumasag ug gikatakdang pasakaan og kasong reckless imprudence resulting in homicide. (BANAT NEWS)
- Latest
