Dump truck nidaro sa mga sakyanan, tindahan, balay

CEBU, Philippines — Usa ka dump truck nitipas sa pikas lane nidaro kini ngadto og mga sakyanan, sari-sari story ug usa ka balay kagahapon sa kadlawon diha sa Sitio Dasuna, Barangay DAS, Dakbayan sa Toledo.

Gikataho nga nakatulog ang drayber nga nagmaneho sa maong sakyanan.

Base sa imbestigasyon sa Toledo City Police Station nga ang Howo dump truck nga adunay plate number nga GAV6283 gimaneho kini ni Peter Capampangan Obsioma, 30- anyos, residente sa Barangay Cambang-ug, Dakbayan sa Toledo.

Gikataho nga ang nahisgutang truck nagbiyahe gikan sa Barangay Magdugo sa nahisgutang siyudad padulong sa Dakbayan sa Naga City.

Matud sa kapolisan nga giingong nakatulog ang drayber samtang nagmaneho hinungdan nga nitipas ang dump truck ug nisulod ngadto sa pikas lane.

Una nga naigo sa dump truck ang usa ka sari-sari store dayon nibangga ngadto sa Yamaha nga motorcycle nga adunay plate number nga 1352GX ug nidaro usab ngadto sa usa ka multicab nga adunay plate number nga KAL6921 nga gi-parking sa daplin sa dalan.

Nipadayon ang dagan sa dump truck ug sa ulahi nabanggaan niini ang usa ka balay diin adunay mga sakyanan nga gi-parking sa garahe.

Apil usab nga nadaro ang upat ka motorsiklo ug usa ka Toyota Fortuner nga adunay plate number GAH746.

Wala pa matino sa kapolisan ang hustong kantidad sa kadaot nga naangkon sa sari-sari store, balay ug mga sakyanan.

Samtang ang drayber sa maong dump truck naangol kini ug daling gidala sa Barangay DAS Ambulance ngadto sa Toledo City General Hospital.

Human sa insidente, gidala sa kapolisan ang drayber ngadto sa police station ug gibutang sa kustodiya samtang gihulat ang pagsang-at sa tukmang kaso batok kaniya. — (BANAT NEWS)