Shaabaa Season 29 Core+ Batch 2018 kampiyon gihapon sa division

CEBU, Philippines —  Ang Core+ Batch 2018 midominar sa BRX Batch 2015, 92-77, sa tinagakay nga duwa sailang best-of-three finals aron paglugwa nga back-to-back champions sa Division C sa Sacred Heart Ateneo Alumni Basketball Athletic Association (SHAABAA) Season 29 niadtong Domingo, Agosto 9, didto sa  Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Franz Ray Diaz miharos og 22 puntos, walo ka rebounds, pito ka assists, ug usa ka steal alang sa  Batch 2018 ni coach Rommel Rasmo samtang si Finals Most Valuable Player Patrick Wilson Yu midugang og 21 puntos, walo ka rebounds, unom ka assists, usa ka steal, ug duha ka blocks.

Si Patrick Yu naglangkob sab sa Mythical 5 kauban sila si season MVP Lucky Ecarma sa Batch 2014 ug ang managsoong Chua nga sila si Benedict Andre (Batch 2018), Anton Bennett (Batch 2015), ug Benj Antoni         (Batch 2026).

Si Andre Chua, nga maoy Defensive Player of the Year, miposte og double-double nga 17 puntos ug 13 ka rebounds alang sa Batch 2018, nga mikontrola sa duwa sa hingpit human sila mi-establisar og 23-15 nga labaw human sa unang kuwarter.

Ang Batch 2018 misira sa first half uban ang 48-36 nga bentaha, nga ila pang giinat ngadto sa 15 puntos sa pinal nga resulta.

Ang Batch 2018 milampos pagdepensa sa ilang trono bisa'g wala ang tulo ka sinaligan nilang players nga sila si Christian Manaytay, Jed Colonia, ug Andrew Velasco.

Sila si Colonia ug Manaytay adunay importanteng giatiman sa kaulohan samtang si Velasco nayayay ang tiil apan giatiman sa kauban niyang Ateneo Hearter nga si Dr. Pierre Mella sa Batch 2000, usa ka  degenerative ug oncologic spine surgeon sa Asian Orthopedics Center, sa dalaygon kaayong pagpakita sa alumni spirit.

Si Chaz Cokaliong maoy nangu sa Batch 2015 uban ang 20 puntos, duha ka rebounds, ug usa ka assist.

Si Janjan Jaboneta mikadlit og double-double nga 18 puntos ug 17 ka rebounds uban ang duha ka assists ug duha ka steals, samtang si Niño Araw-Araw mihipos og 11 puntos, siyam ka rebounds ug upat ka assists sa pildirong kawsa.(BANAT NEWS)