EDITORYAL — Disiplina maoy kulang

Makapahuyhoy og abaga ug makapasagmuyo ang hulagway ug videos sa mura og dagat sa mga basura nga nabara sa Baclaran, apan ang makapahiubos gyud og maayo ang komento sa mga tawo ilabi na diha sa social media.

Nakurat nalang ang mga residente sa Baclaran sa Parañaque City pagmata  nila pagkabuntag adtong Lunes tungod sa nangalisbong baho sa ilang lugar.

Tambak-tambak nga mga klase-klaseng basura gikan sa Manila bay ang nidagsa sa ilang dapit, gani atol ning pagsulat sa editorial kagabii, nagpadayun pa ang Metro Manila Development Authority ug ang Department of Public Works and Highways sa paghakot sa mga basura.

Nganong makapasagmuyo ang reaksyon sa mga tawo? Tungod ni kay mura og sayup ang ilang gipaghot ug gipuntariya sa pagsaway.

Gibasol sa uban ang nasudnong gobiyerno ug gisagolan pa gyud og pamolitika sa uban. Kung buot hunahunaon, daghang balaod nga gipasar para aning hustong paghipos ug pagbahig sa basura.

Sayon kaayo mamasangil sa gobiyerno bahin ani, pero walay gustong moako sa responsibilidad ug moangkon nga ang mga tawo mismo, basin apil pa ang mga nanaway sa gobiyerno ang apil sa nagpataka og labay og basura nga nagtipun-og karon sa Baclaran.

Ang Metro Manila adunay 17 ka mga component cities ug halos tanan dunay mga sapa ug mga dagkong imburnal nga adto tanan lahus padulong sa Manila Bay.

Dinhi sa Cebu, dili layo nga mahitabo sab ni dinhi. Gani matag human sa kusog nga pagbunok sa ulan, matambakan gyud og daghang basura ang baybayon sa South District ug makita ra na kun hunas ang dagat, kasagaran naa diha sa barangay Suba, Ermita, ug Pasil.

Gawas ana, kana diha mismo sa kadagatan sa South Road Properties naay daghang basura nga maglutaw-lutaw.

Kaning tanan responsibilidad sa mga residente ug sa mga LGUs ug dili lang sa nasudnong kagamhanan.

Kinahanglan gyud ang disiplina ug estriktong pagpatuman sa Solid Waste Management Act ug uban pang balaod pangproteksyon sa kalikopan.

Kaning paghipos sa basura ug pagdumala sa hustong pagdispatsar ani, dili trabaho sa nasudnong kagamhanan kondili sa mga tagsa-tagsa ka mga local government units.