Beauty queen, nobyo utas sa salpok

MANILA, Philippines — Idineklarang dead-on-arrival ang isang beauty queen at nobyo nito nang aksidenteng sumalpok ang sinasakyan nilang kotse sa isang nakaparadang truck sa national highway ng Brgy. Minante 2, Cauayan City, Isabela noong Linggo ng gabi, ayon sa ulat kahapon.

Ang mga nasawi ay kinilalang sina Mutya ng Cauayan 2023 Alexis Ann Ramos, 25-anyos at ang nobyo nitong si James Miguel, 30-anyos.

Sa ulat ng Isabela City Police, nangyari ang insidente sa kahabaan ng highway ng lungsod habang lulan ang magkasintahan ng kotse kung saan hindi umano napansin ni Miguel ang nakaparadang truck na puno ng kargang palay sa tabi ng kalsada.

Sa lakas nang pagkakabangga ay nagtamo nang matinding pinsala sa katawan ang magkasintahan.

Desidido ang pamilya ng mga biktima  na sampahan ng kasong double homicide ang driver ng truck na umano’y hindi naglagay ng early warning device.