Dyip iginarahe ng FiberExers

MANILA, Philippines — Kasabay ng pagparada kay balik-import Cameron Clark ay tinapos ng Converge ang apat na sunod na kamalasan.

Iginarahe ng FiberXers ang Terrafirma Dyip, 120-103, para palakasin ang tsansa sa quarterfinals ng PBA Season 50 Governors’ Cup kahapon sa Ynares Center sa Antipolo City.

Kumolekta si Clark, da-ting naglaro para sa NLEX at San Miguel, ng 22 points, 5 rebounds, 3 steals at 2 blocks, habang may 20 at 17 markers si Justin Arana.

Nagdagdag sina Juan Gomez de Liano at Jaydee Tungcab ng tig-13 points kasunod ang 12 markers ni Justin Baltazar.

“Nag-usap usap naman ho kami ng mga bata. Kailangan naming mag-regroup, mag-refocus. Iyong mga missing namin, especially on defense, we need to recover,” ani coach Delta Pineda.

Itinaas ng Converge ang kanilang baraha sa 4-4 para solohin ang ikaapat na puwesto sa Group A at inilaglag ang Terrafirma sa 3-5.

Nauna nang tinakasan ng FiberXers ang Dyip sa first round, 105-103.

Matapos isara ang first period sa 38-23 ay hindi na nagpapigil ang Converge at itinayo ang isang 23-point lead, 49-26, mula sa dalawang free throws ni Abueva sa pagbubukas ng second quarter.

Ibinaon pa nila ang Terrafirma sa halftime, 70-48, hanggang iposte ang 85-56 kalamangan sa 7:47 minuto ng third canto.

Sa likod nina import Justin Strings, Juami Tiongson at Joseph Eriobu ay nakalapit ang Dyip sa 81-91 sa pagsisimula ng fourth period.

Ngunit isang 10-0 bomba ang inihulog ng FiberXers tampok ang tig-isang three-point shot nina Clark at De Liano para muling makalayo sa 101-81.

Mula rito ay hindi na bumitaw ang Converge.