DOE niduso og tulo ka energy bills

CEBU, Philippines — Giduso sa Department of Energy (DOE) ang tulo ka energy bills ngadto sa kongreso nga nagtumong sa pagpalig-on sa energy security, pagpaubos sa gasto sa kuryente ug pagpalapad sa paggamit sa renewable energy sa nasud.

Una, ang National Strategic Petroleum Reserve Program nagmando sa Philippine National Oil Company (PNOC) sa pagtukod ug pagmentinar sa government stockpile sa krudo ug refined petroleum products.

Ang stockpile tukma sa 120 porsiyento sa hiniusang 90-day fuel requirement sa Luzon, Visayas ug Mindanao aron adunay fuel buffer ang nasud kung adunay oil supply disruptions ug kalit nga pagsaka sa presyo sa lana.

Ikaduha, ang pag-amendar sa Akta Republika No. 9136 kun “Electric Power Industry Reform Act” (EPIRA), lakip ang pagpalig-on sa Energy Regulatory Commission (ERC) ug pagsulbad sa isyu sa system loss. Lakip sa gisugyot ang pagdugang sa mga commissioner sa ERC gikan sa upat ngadto sa siyam, samtang padayon usab ang paghisgot sa DOE, ERC, National Electrification Administration, electric cooperatives ug distribution utilities kabahin sa system loss.

Ikatulo, ang proposed Sariling Kuryente Act nga nagtugot sa mga konsumidor sa pag-instolar og rooftop solar panels ug battery systems behind the meter nga dili na kinahanglan og ERC permit.

Pinaagi niini, ang ERC maoy magtakda sa technical standards aron masiguro nga dili makabalik sa distribution utility o power grid ang kuryenteng mamugna sa mga solar system. — /BDB (BANAT NEWS)